Indian Woman Cricketer Harleen Deol met Captain Cool MS Dhoni in Ranchi:

भारतीय संघाचा माजी कर्णधार एमएस धोनीची क्रेज केवळ चाहत्यांमध्येच नाही, तर सेलिब्रेटिंमध्येही आहे. अनेक क्रिकेटपटूही त्याचे चाहते आहेत. नुकतेच भारतीय महिला क्रिकेट संघाची क्रिकेटपटू हरलीन देओलने धोनीबरोबरचा तिचा फॅन मुमेंट शेअर केला आहे.

धोनीने त्याच्या कारकिर्दीत खेळाडू, यष्टीरक्षक आणि कर्णधार म्हणून मोठे यश मिळवले आहे. त्यामुळे त्याला आदर्श मानणारे अनेक युवा क्रिकेटपटू आहेत. 2020 मध्ये हरलीननेही ती धोनीची चाहती असल्याचे आणि त्याला आदर्श मान असल्याचे सांगितले आहे.

आता तिला धोनीला भेटण्याचीही संधी मिळाली आहे. अष्टपैलू हरलीन धोनीला त्याच्या शहरात म्हणजे रांचीमध्ये झारखंड क्रिकेट असोसिएशनच स्टेडियमवर भेटली. त्यावेळी त्यांच्यात चर्चाही झाली. याबद्दल तिने सोशल मीडियावर पोस्ट शेअर केली आहे. तिने यात म्हटले आहे की धोनीला भेटणे हा अविश्वसनीय क्षण होता.

तिने धोनीबरोबरचे फोटो शेअर केले असून त्याला कॅप्शन दिले आहे की 'हा क्षण अविश्वसनीय वाटला. माझ्या आदर्श व्यक्तीबरोबर घालवलेल्या प्रत्येक क्षणाचा आनंद घेतला. सध्या भारतात आधीच थंडी आहे, पण ही माझ्यासाठी कॅप्टनकूल मुमेंट आहे.'

'मी खेळाडू म्हणून तुला आदर्श मानत होते, पण तुला भेटल्यानंतर एक माणूस म्हणूनही तुझा आदर्श ठेवेल. मला अजूनही विश्वास बसत नाहीये, की मी तुला भेटले.'

हरलीनची ही पोस्ट सध्या व्हायरल होत असून अनेक चाहत्यांनी त्यावर कमेंट्सही केल्या आहेत.

दरम्यान, हरलीन नुकतीच ऑस्ट्रेलियाविरुद्ध वनडे मालिकेत खेळली. तिला या मालिकेतील दुसऱ्या सामन्यात संधी मिळाली होती. पण तिला फार काही करता आले नाही. ती १ धाव करून बाद झाली. आता ती फेब्रुवारीमध्ये सुरु होणाऱ्या वूमन्स प्रीमियर लीग (WPL) स्पर्धेत खेळताना दिसेल. ती या स्पर्धेत गुजरात जायंट्स संघाचा भाग आहे.

धोनी खेळणार आयपीएल 2024

धोनीने आंतरराष्ट्रीय क्रिकेटमधून निवृत्ती घेतलेली असली, तरी त्याने आयपीएलमध्ये खेळणे सुरू ठेवले आहे. तो आता आयपीएलच्या 17 व्या हंगामातही चेन्नई सुपर किंग्सकडून खेळताना दिसणार आहे. तथापि तो या हंगामात नेतृत्व करणार की दुसऱ्या खेळाडूकडे ही जबाबदारी सोपवणार हे अद्याप गुलदस्त्यात आहे.