पणजी: कोलकात्याच्या एटीके मोहन बागान संघाने (ATK Mohan Bagan Team) आक्रमक मध्यरक्षक ह्यूगो बुमूस (Hugo Bumus) याला मुंबई सिटीकडून घेताना इंडियन सुपर लीग (Indian Super League) (आयएसएल) फुटबॉल स्पर्धा इतिहासातील सर्वाधिक रक्कम दिली आहे. या फ्रेंच-मोरोक्कन फुटबॉलसाठी सुमारे दोन कोटी रुपये ट्रान्सफर फी मोजण्यात आल्याचे वृत्त आहे.

एटीके मोहन बागानतर्फे अजून बुमूसची करार रक्कम जाहीर करण्यात आलेली नाही. 2020-21 मोसमाच्या प्रारंभी स्पॅनिश सर्जिओ लोबेरा यांनी मुंबई सिटीचे प्रशिक्षकपद स्वीकारले. त्यानंतर 25 वर्षीय बुमूसला एफसी गोवाकडून मुंबईतील संघात घेताना अंदाजे 1.5 कोटी रुपयांचा करार झाल्याची तेव्हा माहिती होती.. त्यावेळचा करार रक्कम विक्रम आता एटीके मोहन बागानने मोडला आहे.

बुमूस आयएसएल स्पर्धेतील चार मोसमात 58 सामने खेळला असून त्याने 19 गोल व 24 असिस्ट अशी कामगिरी केली आहे. एफसी गोवातर्फे खेळताना 2019-20 मोसमात तो आयएसएल स्पर्धेतील सर्वोत्तम खेळाडू ठरला होता.

स्पॅनिश अंतोनियो लोपेझ हबास (Lopez Habas) यांच्या मार्गदर्शनाखालील एटीके मोहन बागान संघाने आगामी मोसमासाठी मजबूत संघ बांधणीवर भर दिला आहे. या संघाने गोमंतकीय आघाडीपटू लिस्टन कुलासो याला हैदराबाद एफसीकडून करारबद्ध केले आहे. त्यासाठी आयएसएलमधील गतउपविजेत्या संघाने एक कोटी रुपये ट्रान्सफर शुल्क मोजल्याची माहिती आहे. आयएसएलच्या इतिहासात लिस्टन महागडा भारतीय फुटबॉलपटू मानला जातो.