Rohit Sharma: भारतीय क्रिकेट संघ गुरुवारपासून (9 फेब्रुवारी) ऑस्ट्रेलियाविरुद्ध नागपूरमध्ये कसोटी मालिकेतील पहिला सामना खेळत आहे. या सामन्याच्या पहिल्या दिवसाखेर भारताचा कर्णधार रोहित शर्मा 56 धावांवर नाबाद आहे. या दरम्यान त्याच्या नावावर एक मोठा विक्रम झाला आहे.

ऑस्ट्रेलियाचा पहिला डाव 177 धावांवर संपल्यानंतर भारतीय संघ पहिल्या दिवशी पहिल्या डावात फलंदाजीला उतरला आहे. दरम्यान, रोहितने सुरुवातीपासूनच चांगला खेळ केला. त्याने ऑस्ट्रेलियन कर्णधार पॅट कमिन्सच्या पहिल्याच षटकात तीन चौकार मारले होते. त्याच्या या खेळामुळे त्याने पहिल्याच दिवशी अर्धशतकही पूर्ण केले.

त्यामुळे तो आता कमीत कमी 30 कसोटी डाव खेळलेल्या खेळाडूंमध्ये मायदेशात कसोटीत सर्वाधिक फलंदाजी सरासरी असलेला तो दुसऱ्या क्रमांकाचा खेळाडू ठरला आहे. त्याने नागपूर कसोटीच्या पहिल्या दिवसाखेरपर्यंत मायदेशात 75.66 च्या सरासरीने धावा केल्या आहेत.

मायदेशात कसोटीत सर्वाधिक फलंदाजी सरासरी असलेल्या (कमीत कमी 30 डाव) फलंदाजांमध्ये रोहितच्या वर केवळ डॉन ब्राॅडमन आहेत. ब्रॅडमन यांनी त्यांच्या मायदेशात म्हणजेच ऑस्ट्रेलियामध्ये 98.22 च्या सरासरीने धावा केल्या आहेत. या यादीत ब्रॅडमन आणि रोहितनंतर मार्नस लॅब्युशेन आहे. त्याने ऑस्ट्रेलियामध्ये 70.50 च्या सरासरीने धावा केल्या आहेत.

रोहितने मायदेशात कसोटीत आत्तापर्यंत 21 सामन्यामधील 31 डावात 75.66 च्या सरासरीने 1816 धावा केल्या आहेत.

पहिल्या दिवशी भारताचे वर्चस्व

नागपूर कसोटीत पहिल्या दिवशी भारतीय संघाचे वर्चस्व दिसून आले. या सामन्यात ऑस्ट्रेलियाने नाणेफेक जिंकून प्रथम फलंदाजी करण्याचा निर्णय घेतला होता. पण भारतीय गोलंदाजांनी ऑस्ट्रेलियाचा पहिला डाव 177 धावांतच आटोपला.

ऑस्ट्रेलियाकडून मार्नस लॅब्युशेनने सर्वाधिक 49 धावा केल्या. भारताकडून रविंद्र जडेजाने सर्वाधिक 5 विकेट्स घेतल्या, तसेच आर अश्विनने 3 विकेट्स घेतल्या, तर मोहम्मद सिराज आणि मोहम्मद शमी यांनी प्रत्येकी 1 विकेट घेतली.

त्यानंतर फलंदाजीला उतरलेल्या भारताकडून रोहित शर्मा आणि केएल राहुल यांनी सलामीला 76 धावांची भागीदारी केली. पण ही भागीदारी दिवसाच्या अखेरीस टॉड मर्फीने केएल राहुलला 20 धावांवर बाद करत मोडली. पहिल्या दिवसाखेर भारताने 24 षटकात 1 बाद 77 धावा केल्या आहेत. भारताकडून रोहित 56 धावांवर आणि अश्विन शुन्यावर नाबाद आहेत.