Indian Hockey Team beat Malaysia 5-0 in Asian Champions Trophy Chennai 2023: भारतीय हॉकी संघ आशिया चॅम्पियन्स ट्रॉफी 2023 स्पर्धेत पहिल्या तीन्ही सामन्यांनंतर अपराजित राहिला आहे. भारताचा तिसरा सामना रविवारी बलाढ्य मलेशियाविरुद्ध झाला होता. भारताने मलेशियालाही पराभवाचे पाणी पाजले.

भारताने मलेशियाविरुद्ध 5-0 असा दणदणीत विजय मिळवला असून गुणतालिकेतही अव्वल स्थान गाठले आहे. यापूर्वी भारताने चीनविरुद्ध 7-2 असा विजय मिळवला होता, तर जपानविरुद्ध 1-1 अशी बरोबरी स्विकारली होती.

मलेशियाविरुद्ध मेयर राधाकृष्णन हॉकी स्टेडियमवर झालेल्या या सामन्यात भारताकडून कार्थी सेल्वम (15'), हार्दिक सिंग (32'), हरमनप्रीत सिंग (42'), गुरजंत सिंग (53') आणि जुगराज सिंग (54') यांनी गोल नोंदवले. महत्त्वाचे म्हणजे हरमनप्रीतने पेनल्टी कॉर्नरवर नोंदवलेला गोल त्याच्यासाठी खास ठरला. हा त्याचा आंतरराष्ट्रीय कारकिर्दीतील 150 वा गोल ठरला.

या सामन्यापूर्वी मलेशिया गुणतालिकेत अव्वल क्रमांकावर होते. त्यांनी पाकिस्तानविरुद्ध ३-१ आणि चीनविरुद्ध 5-1 असा विजय मिळवलेला होता. पण भारताने मलेशियाला पराभूत करत अव्वल क्रमांक पटकावला.

आता भारताचा या स्पर्धेतील चौथा सामना 7 ऑगस्ट रोजी कोरिया विरुद्ध होणार आहे. या सामन्याला भारतीय प्रमाणवेळेनुसार रात्री 8.30 वाजता सुरुवात होईल.