India vs New Zealand: रोहित शर्माच्या नेतृत्वाखालील भारतीय संघाने न्यूझीलंड वनडे मालिकेत विजयी सुरुवात केली आहे. हैदराबादमध्ये बुधवारी झालेल्या पहिल्या एकदिवसीय सामन्यात भारताने 12 धावांनी रोमांचक विजय नोंदवला. शुभमन गिलच्या द्विशतकाच्या जोरावर भारताने 350 धावांचे लक्ष्य दिले, त्याला प्रत्युत्तरात किवी संघ 49.2 षटकात 337 धावांवर गारद झाला.

न्यूझीलंडकडून मायकेल ब्रेसवेल (78 चेंडूत 140) याने सर्वाधिक धावा केल्या. त्याने झंझावाती शतकी खेळीमध्ये 12 चौकार आणि 10 षटकार मारले. तर भारताकडून मोहम्मद सिराजने चार विकेट घेतल्या. कुलदीप यादव आणि शार्दुल ठाकूर यांनी प्रत्येकी दोन गडी बाद केले. मोहम्मद शमी आणि हार्दिक पांड्याला प्रत्येकी एक विकेट मिळाली.

दरम्यान, सलामीवीर शुभमन गिलने शानदार फलंदाजी करताना आपल्या एकदिवसीय कारकिर्दीतील पहिले द्विशतक ठोकले. त्याने 149 चेंडूंचा सामना केल्यानंतर 208 धावा केल्या. त्याने आपल्या खेळीत 19 चौकार आणि 9 षटकार मारले. गिलने 49 व्या षटकात षटकारांची हॅट्ट्रिक मारुन द्विशतक पूर्ण केले. तर न्यूझीलंडकडून (New Zealand) हेन्री शीप्ली आणि डॅरिल मिशेल यांनी प्रत्येकी दोन, तर लॉकी फर्ग्युसन, ब्लेअर टिकनर आणि मिचेल सेन्चर यांनी प्रत्येकी एक बळी घेतला.

दुसरीकडे, भारताने आपल्या डावाची संयमी सुरुवात केली. गिल आणि रोहित शर्माने पहिल्या विकेटसाठी 60 धावांची भागीदारी केली. रोहित 13 व्या षटकात 38 चेंडूत 34 धावा काढून बाद झाला. तर ईशान किशननेही (Ishan Kishan) (14 चेंडूत 5 धावा) स्वस्तात विकेट गमावली. सूर्यकुमार यादवने (31) गिलसोबत चौथ्या विकेटसाठी 65 धावांची भागीदारी केली. 29 व्या षटकात सूर्या बाद झाला.

तसेच, गिलने हार्दिक पंड्यासोबत (38 चेंडूत 28) पाचव्या विकेटसाठी 74 धावांची भागीदारी केली. वॉशिंग्टन सुंदर (12) आणि शार्दिक ठाकूर (3) विशेष काही करु शकले नाहीत. 50 व्या षटकाच्या दुसऱ्या चेंडूवर गिल आठवा खेळाडू म्हणून बाद झाला. तर कुलदीप यादव (5*) आणि मोहम्मद शमी (2*) नाबाद राहिले.