India vs Hong Kong Asia Cup 2022: आशिया चषकाच्या पहिल्या सामन्यात भारताने पाकिस्तानचा धमाकेदार स्टाईलमध्ये पराभव केला. आज (31st August) भारतीय संघाला हाँगकाँगसारख्या कमकुवत संघाशी मुकाबला करायचा आहे. टीम इंडिया आणि हाँगकाँग यांची तुलनाच होऊ शकत नाही. परंतु हाँगकाँगमध्ये असे अनेक खेळाडू आहेत, जे भारतासाठी धोकादायक ठरु शकतात. अवघ्या काही चेंडूंमध्ये सामन्याचा चेहरा-मोहरा बदलण्यात हे खेळाडू पटाईत आहेत. हाँगकाँगच्या या खेळाडूंपासून रोहित सेनेला सतर्क राहावे लागणार आहे. जाणून घेऊया या खेळाडूंबद्दल...

1. किंचित शहा

किंचित शाहला अष्टपैलू खेळाडू म्हणून हाँगकाँग संघात स्थान मिळाले आहे. किंचितचा जन्म 9 डिसेंबर 1995 रोजी मुंबईत झाला. त्यानंतर तो हाँगकाँगमध्ये स्थायिक झाला. भारताविरुद्धच्या सामन्यात हाँगकाँगच्या प्लेइंग इलेव्हनमध्ये त्याचा समावेश केला जाऊ शकतो. त्याला टी-20 क्रिकेट खेळण्याचा चांगला अनुभव आहे. त्याने 43 आंतरराष्ट्रीय टी-20 सामने खेळले आहेत, ज्यामध्ये त्याने 633 धावा केल्या आहेत.

2.आयुष शुक्ला

आयुष शुक्लाचा (Ayush Shukla) गोलंदाज म्हणून हाँगकाँग संघात समावेश करण्यात आला आहे. त्याने आतापर्यंत पाच टी-20 आंतरराष्ट्रीय सामने खेळले आहेत. या सामन्यांमध्ये त्याने पाच विकेट्स घेतल्या आहेत. T20 क्रिकेटमध्ये (T20 Cricket) तो शानदार गोलंदाजी करतो. तो खूप किफायतशीर देखील आहेत. UAE विरुद्ध त्याने 30 धावांत 3 महत्त्वाचे बळी घेतले होते. अशा स्थितीत भारतीय फलंदाजांनी या खेळाडूपासून सावध राहण्याची गरज आहे.

3. अहान त्रिवेदी

17 वर्षीय अहान त्रिवेदीला (Ahan Trivedi) आशिया कपसाठी हाँगकाँग (Hong Kong) संघात स्थान मिळाले आहे. हाँगकाँग संघाकडून त्याने अद्याप पदार्पण केलेले नाही. हाँगकाँगसाठी या खेळाडूने देशांतर्गत सर्किटमध्ये शानदार कामगिरी केली आहे. याच कारणामुळे त्याला राष्ट्रीय संघात स्थान देण्यात आले आहे. त्याच्या खेळाबद्दल भारतीय खेळाडू अनभिज्ञ आहेत. अशा परिस्थितीत या खेळाडूला भारताविरुद्ध खेळण्याची संधी मिळाली तर टीम इंडियाला सतर्क रहावे लागणार आहे.