Shreyas Iyer Back injury: भारत विरुद्ध ऑस्ट्रेलिया संघात अहमदाबाद येथील नरेंद्र मोदी स्टेडियममध्ये कसोटी मालिकेतील चौथा सामना सुरू आहे. या सामन्यात ऑस्ट्रेलियाने पहिल्या डावात 480 धावा केल्या आहेत, तर भारतानेही चौथ्या दिवशी पहिल्या डावात 400 धावांचा टप्पा पार केला आहे.

मात्र, भारताने पाच विकेट्स गमावल्यानंतरही श्रेयस अय्यर फलंदाजीला आला नव्हता. खरंतर श्रेयस मधल्या फळीतील फलंदाज आहे. त्यामुळे तो कसोटीत बऱ्याचदा पाचव्या किंवा सहाव्या क्रमांकावर फलंदाजीला येतो. मात्र, तो चालू कसोटीत लवकर फलंदाजीला का आला नाही, असा प्रश्न अनेकांना पडला.

पण, आता असे समोर आले आहे की श्रेयसला सामन्याच्या तिसऱ्या दिवशीच पाठीमध्ये वेदना जाणवत होत्या. त्याच्या दुखापतीबद्दल बीसीसीआयने माहिती दिली आहे की 'श्रेयस अय्यरने तिसऱ्या दिवशीच्या खेळानंतर पाठीमध्ये वेदना होत असल्याची तक्रार केली होती. त्यामुळे त्याला स्कॅनसाठी घेऊन जाण्यात आले आहे आणि त्याच्या दुखापतीवर सध्या बीसीसीआय मेडिकल टीम लक्ष ठेवून आहे.'

मात्र, बीसीसीआने श्रेयस या सामन्यात पुढे खेळणार आहे की नाही, याबद्दल कोणतेही स्पष्टीकरण दिलेले नाही.

श्रेयसला पाठीच्या दुखापतीचा त्रास होण्याची ही पहिली वेळ नाही. यापूर्वी जानेवारी महिन्यात श्रीलंकेविरुद्ध वनडे सामन्यात खेळताना पाठीची दुखापत झाली होती. त्यानंतर तो न्यूझीलंडविरुद्धच्या मर्यादीत षटकांच्या मालिकेला मुकावे लागले होते. तसेच याच दुखापतीमुळे तो ऑस्ट्रेलियाविरुद्धच्या पहिल्या कसोटी सामन्यातही खेळला नव्हता.

त्याने त्याच्या या दुखापतीवर राष्ट्रीय क्रिकेट अकादमीमध्ये कामही केले. त्यानंतर त्याने ऑस्ट्रेलियाविरुद्धच्या दुसऱ्या कसोटीतून पुनरागमन केले होते. मात्र, त्याला मोठी खेळी करण्यात अपयश आले आहे. त्याने या कसोटी मालिकेत दुसऱ्या आणि तिसऱ्या कसोटीत मिळून ३२ धावा केल्या आहेत.

श्रेयसची कारकिर्द

श्रेयसने आत्तापर्यंत 9 कसोटी सामन्यांमध्ये 666 धावा केल्या आहेत. तसेच त्याने 42 वनडे सामन्यांमध्ये 1631 धावा केल्या आहेत. त्याने 49 आंतरराष्ट्रीय टी20 सामने खेळले असून 1043 धावा केल्या आहेत. त्याने आंतरराष्ट्रीय कारकिर्दीतीत तीन शतके केली आहेत.