India vs Afghanistan, 1st T20I Match at Mohali, probable Playing XI:

भारत विरुद्ध अफगाणिस्तान संघात गुरुवारपासून (11 जानेवारी) तीन सामन्यांच्या टी20 मालिकेला सुरुवात होणार आहे. या मालिकेतील पहिला सामना मोहालीला होणार आहे. या सामन्याला भारतीय प्रमाणवेळेनुसार संध्याकाळी 7 वाजल्यापासून सुरुवात होणार आहे.

या मालिकेसाठी रोहित शर्मा आणि रोहित शर्मा यांचे भारतीय संघात पुनरागमन झाले आहे. असे असले तरी पहिल्या सामन्यासाठी विराट कोहली वैयक्तिक कारणामुळे उपलब्ध नसल्याचे प्रशिक्षक राहुल द्रविडने स्पष्ट केले आहे. तसेच द्रविडने असेही सांगितले आहे की सलामीला रोहित आणि यशस्वी जयस्वालची जोडी उतरेल.

त्यामुळे आता पहिल्या सामन्यासाठी भारताची प्लेइंग इलेव्हन कशी असेल, असा प्रश्न अनेक चाहत्यांना पडला असेल. त्याचाच घेतलेला हा आढावा.

द्रविडने म्हटल्याप्रमाणे रोहितसह जयस्वाल सलामील फलंदाजी करताना दिसू शकतो. तसेच विराटच्या अनुपस्थितीत पहिल्या सामन्यात शुभमन गिल तिसऱ्या क्रमांकावर फलंदाजी करताना दिसू शकतो.

त्याचबरोबर मधल्या फळीत तिलक वर्मा आणि रिंकू सिंग फलंदाजी फळीत असू शकतात. याशिवाय यष्टीरक्षक फलंदाज म्हणून संजू सॅमसनला जितेश शर्माच्या आधी पहिली पसंती मिळू शकते. अक्षर पटेल अष्टपैलू म्हणून खेळू शकतो. तो फिरकी गोलंदाजीतही योगदान देईल. त्याला कुलदीप यादवची साथ मिळू शकते.

तसेच अर्शदीप सिंग, आवेश खान आणि मुकेश कुमार वेगवान गोलंदाजीची धूरा सांभाळताना दिसू शकतात. दरम्यान तिलकही पार्टटाईम फिरकी गोलंदाज म्हणून योगदान देऊ शकतो.

आमने-सामने कामगिरी

लक्षात घेण्यासारखी गोष्ट अशी की भारत आणि अफगाणिस्तान संघात होणारी ही पहिलीच द्विपक्षीय टी20 मालिका आहे. यापूर्वी भारत आणि अफगाणिस्तान संघात द्विपक्षीय टी20 मालिका झालेली नाही.

भारत आणि अफगाणिस्तान वेगवेगळ्या स्पर्धेत आत्तापर्यंत 5 टी20 सामने खेळले आहेत. यातील 4 सामने भारताने जिंकले आहेत, तर एका सामन्याचा निकाल लागलेला नाही.

पहिल्या टी20 साठी असा असू शकतो भारताता संभावित प्लेइंग इलेव्हन -

रोहित शर्मा (कर्णधार), यशस्वी जयस्वाल, शुभमन गिल, तिलक वर्मा, रिंकू सिंग, संजू सॅमसन (यष्टीरक्षक), अक्षर पटेल, अर्शदीप सिंग, आवेश खान, कुलदीप यादव, मुकेश कुमार.