India vs England, 3rd Test Match at Rajkot, 1st Day

भारत विरुद्ध इंग्लंड संघात सध्या पाच सामन्यांची कसोटी मालिका सुरू असून या मालिकेतील तिसऱ्या सामन्याला गुरुवारी (15 फेब्रुवारी) सुरूवात झाली. राजकोटमधील निरंजन शाह क्रिकेट स्टेडियमवर सुरू असलेल्या या सामन्यात भारताने पहिल्या दिवसाखेर पहिल्या डावात 86 षटकात 5 बाद 326 धावा केल्या आहेत.

पहिल्या दिवशी भारताकडून रोहित शर्मा, रविंद्र जडेजा यांनी शतके केली, तर सर्फराजने अर्धशतक केले. पहिल्या दिवशी गोलंदाजीत मार्क वूड चमकला.

या सामन्यात भारताचा कर्णधार रोहित शर्माने नाणेफेक जिंकून प्रथम फलंदाजी करण्याचा निर्णय घेतला होता. त्यामुळे रोहितसह यशस्वी जयस्वाल भारताकडून पहिल्या डावात सलामीला फलंदाजीला उतरले. जयस्वालने दोन चौकार ठोकत चांगली सुरूवात केली होती.

मात्र मार्क वूडने सुरुवातीपासूनच चांगली गोलंदाजी केली होती. त्याने जयस्वालला 10 धावांवर चौथ्याच षटकात माघारी धाडले. जयस्वालचा झेल स्लीपमध्ये जो रुटने पकडला. त्यानंतर लगेचच सहाव्या षटकात शुभमन गिलही 9 चेंडूत एकही धाव न करता मार्क वूडच्याच गोलंदाजीवर बाद झाला. त्याचा झेल यष्टीरक्षक बेन फोक्सने पकडला.

यानंतर रजत पाटीदारने कर्णधाराला साथ देण्याचा प्रयत्न केला. परंतु, पाटीदारला 5 धावांवर टॉम हर्टलीने माघारी धाडले. त्यामुळे 33 धावातच 3 विकेट्स गमावल्याने भारताला मोठा धक्का बसला होता.

परंतु, पाचव्या क्रमांकावर बढतील मिळालेल्या जडेजाने रोहितला भक्कम साथ दिली. या दोघांनी इंग्लंडच्या गोलंदाजांना फार वरचढ होऊ दिले नाही. दरम्यान, रोहितला अनेकदा बाद करण्याच्या संधी इंग्लंडला मिळाल्या, मात्र तो सुदैवी ठरला.

रोहितने तिसऱ्या सत्रात्या सुरुवातीलाच त्याचे 11 वे कसोटी शतकही पूर्ण केले. पण शतकानंतर तो बाद झाला. त्याला वूडनेच माघारी धाडले. रोहितने 196 चेंडूत 14 चौकार आणि 3 षटकारांसह 196 धावा केल्या. त्याच्यात आणि जडेजामध्ये 204 धाावंची भागीदारीही झाली.

रोहित बाद झाल्यानंतर सर्फराज फलंदाजीला आला होता. यावेळी त्याला वूडने सुरुवातीला संघर्ष करायला लावला. परंतु, खेळपट्टीवर स्थिरावल्यावर सर्फराजने आक्रमक खेळण्यास सुरुवात केली. त्याने फिरकीपटूंविरुद्ध आक्रमण केले. यावेळी दुसरी बाजू जडेजाने सांभाळली होती.

सर्फराजने 48 चेंडूत त्याचे अर्धशतकही पूर्ण केले. परंतु, 82 व्या षटकात जडेजा 99 धावांवर असताना एकेरी धावेसाठी त्याने कॉल दिला होता. ते पाहून नॉन-स्ट्रायकरवर असलेला सर्फराज पळाला, परंतु तो पुढे आलेला असतानाच जडेजाने पुन्हा धावेसाठी नकार दिला.

यावेळी मार्क वूडने सर्फराज पुन्हा क्रिजमध्ये पोहचल्यापूर्वीच स्टंपवरील बेल्स उडवले. त्यामुळे सर्फराजला 66 चेंडूत 62 धावा करून धावबाद होत माघारी परतावे लागले. त्यामुळे कुलदीप यादव नाईट वॉचमन म्हणून फलंदाजीला आला.

यावेळी सर्फराज बाद झाल्यानंतर पुढच्याच चेंडूवर जडेजाने शतक केले. परंतु, त्याने जोरदार सेलिब्रेशन केले नाही. दरम्यान, जडेजा आणि कुलदीपने आणखी विकेट जाऊ दिली नाही. जडजा 212 चेंडूत 110 धावांवर नाबाद आहे, तर कुलदीप 1 धावेवर नाबाद आहे. यादरम्यान जडेजाने कसोटी कारकिर्दीत 3000 धावाही पूर्ण केल्या.

दरम्यान इंग्लंडकडून गोलंदाजी करताना पहिल्या दिवशी मार्क वूडने 3 विकेट्स घेतल्या, तर टॉम हर्टलीने 1 विकेट घेतली.