IND vs BAN: भारतीय संघाला बांगलादेशविरुद्ध बुधवारी झालेल्या वनडे मालिकेतील दुसऱ्या सामन्यात अखेरच्या क्षणी पराभवचा धक्का बसला. हा सामना भारतीय संघ 5 धावांनी पराभूत झाला, त्यामुळे भारताने मालिकाही गमावली आहे. अशातच आता भारताच्या 3 खेळाडूंना दुखापतींमुळे या मालिकेतून बाहेर पडावे लागले आहे.

दुसऱ्या वनडे सामन्यानंतर भारतीय प्रशिक्षक राहुल द्रविडने माहिती दिली की रोहित शर्माबरोबरच कुलदीप सेन आणि दीपक चाहर हे खेळाडूही वनडे मालिकेतील अखेरच्या सामन्यातून बाहेर झाले आहेत. हे तिन्ही खेळाडू दुखापतग्रस्त आहेत.

(India's three players ruled out from ODI Series against Bangladesh)

रोहितच्या डाव्या हाताच्या अंगठ्याजवळ दुसऱ्या वनडेदरम्यान दुसऱ्याच षटकात क्षेत्ररक्षण करताना चेंडू लागला. त्यामुळे त्याच्या अंगठ्याजवळून रक्तही येत होते. त्यामुळे त्याच्या हाताचे स्कॅनही करण्यात आले. पण असे असतानाही संघाला गरज असल्याने तो अंगठ्याला बँडेज बांधून फलंदाजीसाठी उतरला होता.

मात्र, त्याची ही दुखापत गंभीर असण्याची शक्यता आहे. त्यामुळे तो तिसऱ्या वनडेला मुकणार आहे. तसेच तो आता मुंबईलाही परत जाईल आणि वैद्यकीय तज्ञांचा सल्ला घेईल, त्यानंतरच पुढचा निर्णय होईल, असे द्रविडने सांगितले आहे. त्यामुळे आता बांगलादेशविरुद्धच्या आगामी कसोटी मालिकेतील रोहितच्या उपस्थितीवरही प्रश्नचिन्ह निर्माण झाले आहे.

तसेच कुलदीप सेनला पहिल्या वनडेनंतरच पाठीच्या दुखापतीचा त्रास जाणवत होता. त्यामुळे तो दुसऱ्या सामन्यातही खेळला नव्हता. त्याचबरोबर दीपक चाहरही दुसऱ्या वनडेत केवळ 3 षटके गोलंदाजी करू शकला होता. त्यालाही गोलंदाजी करताना सहजता जाणवत नव्हती. त्यामुळे ते देखील पुढील वनडे सामना खेळू शकणार नसल्याची माहिती द्रविडने दिली.

भारताला बांगलादेशविरुद्धचा तिसरा वनडे 10 डिसेंबर रोजी होणार आहे. या सामन्यात विजय मिळवून प्रतिष्ठा राखण्याचे आव्हान भारतासमोर आहे, तर बांगलादेशचा प्रयत्न भारताला व्हाईटवॉश देण्याचा असेल.