ICC ODI Cricket World Cup 2023, India vs Sri Lanka at Wankhede Stadium in Mumbai:

वनडे वर्ल्डकप 2023 स्पर्धेत गुरुवारी भारत विरुद्ध श्रीलंका संघात सामना होणार आहे. हा सामना मुंबईतील वानखेडे स्टेडियमवर रंगणार आहे. या सामन्यात श्रीलंका संघाने नाणेफेक जिंकली असून प्रथम गोलंदाजी करण्याचा निर्णय घेतला आहे.

दरम्यान, नाणेफेकीवेळी भारताचा कर्णधार रोहित शर्माने सांगितले की नाणेफेक हरली असली, तरी त्यांना प्रथम फलंदाजीच करायची होती आणि श्रीलंकेने प्रथम गोलंदाजी करण्याचा निर्णय घेतला असल्याने त्यांना प्रथम फलंदाजीचीच संधी मिळणार आहे. रोहितने आशा व्यक्त केली आहे की दुसऱ्या डावात भारताच्या वेगवान गोलंदाजांना मदत मिळेल.

या सामन्यासाठी भारताने प्लेइंग इलेव्हनमध्ये कोणताही बदल केलेला नाही, तर श्रीलंकेने धनंजय डी सिल्वाच्या जागेवर दुशन हेमंथाला संधी दिली आहे.

तथापि, हा सामना दोन्ही संघांसाठी महत्त्वाचा आहे. भारताने या सामन्यात विजय मिळवल्यास ते उपांत्य सामन्यातील स्थान पक्के करतील, तर श्रीलंकेला आपले आव्हान कायम ठेवण्यासाठी या सामन्यात विजय गरजेचाच आहे.

विशेष म्हणजे 12 वर्षांपूर्वी म्हणजे 2 एप्रिल 2011 रोजी भारत आणि श्रीलंका संघात वानखेडे स्टेडियमवरच वर्ल्डकप 2011 स्पर्धेचा अंतिम सामना झाला होता. या सामन्यात भारताने विजय मिळवला होता आणि दुसऱ्यांदा विश्वविजेतेपद आपल्या नावावर केले होते.

या सामन्यानंतर पुन्हा एकदा हे दोन संघच वानखेडे स्टेडियमवर वर्ल्डकपचा सामना खेळण्यासाठी आमने-सामने आले आहेत.

असे आहेत प्लेइंग इलेव्हन -

• भारत - रोहित शर्मा (कर्णधार), शुभमन गिल, विराट कोहली, श्रेयस अय्यर, केएल राहुल (यष्टीरक्षक), सूर्यकुमार यादव, रवींद्र जडेजा, मोहम्मद शमी, जसप्रीत बुमराह, कुलदीप यादव, मोहम्मद सिराज

• श्रीलंका - पाथम निसंका, दिमुथ करुणारत्ने, कुसल मेंडिस (यष्टीरक्षक/कर्णधार), सदीरा समरविक्रमा, चरिथ असलंका, अँजेलो मॅथ्यूज, दुशन हेमंथा, महिश तिक्षणा, कसून रजिथा, दुष्मंथा चमीरा, दिलशान मदुशंका