ICC ODI Cricket World Cup 2023, India vs Bangladesh, Hardik Pandya Injury :
वनडे वर्ल्डकप 2023 स्पर्धेतील 17 वा सामना भारत आणि बांगलादेश संघात होत आहे. हा सामना पुण्यातील महाराष्ट्र क्रिकेट असोसिएशनवर सुरु आहे. मात्र, हा सामना सुरू असतानाच भारतीय संघाला मोठा धक्का बसला आहे.
भारताचा अष्टपैलू खेळाडू हार्दिक पंड्या या सामन्यादरम्यान दुखापतग्रस्त झाला. त्यामुळे त्याला मैदानातून बाहेरही जावे लागले असून त्याबद्दल बीसीसीआयने माहिती दिली आहे. बीसीसीआयने दिलेल्या माहितीनुसार सध्या हार्दिकच्या दुखापतीवर उपचार सुरू असून त्याच्या पायाचे स्कॅन करण्यात येणार आहे.
झाले असे की या सामन्यात प्रथम फलंदाजी करत असलेल्या बांगलादेशकडून तान्झिद हसन आणि लिटन दास सलामीला फलंदाजी करत होते. त्यांनी चांगली सुरुवात दिली होती. त्यावेळी 9 व्या षटकात हार्दिक गोलंदाजीसाठी आला. त्याच्या या षटकात पहिल्या चेंडूवर एकही धाव निघाली नाही, पण दुसऱ्या आणि तिसऱ्या चेंडूवर लिटन दासने चौकार ठोकले.
दरम्यान तिसऱ्या चेंडूवर लिटनने सरळ फटका खेळला होता. त्यावर हार्दिकने पायाने तो चेंडू आडवण्याचा प्रयत्न केला. मात्र, या प्रयत्नात तो घसरून खाली पडला आणि जखमी झाला. यावेळी त्याला नीट चालता येत नव्हते.
त्यावेळी भारतीय संघाची मेडिकल टीम मैदानात आली आणि त्यांनी त्याच्यावर उपचार केले. मात्र, त्यानंतर हार्दिकला मैदानाबाहेर जावे लागले. त्याच्या 9 व्या षटकातील उर्वरित तीन चेंडू विराट कोहलीने टाकले. विराटने उर्वरित 3 चेंडूत 2 धावा दिल्या. दरम्यान, विराट तब्बल 6 वर्षांनी वनडेमध्ये गोलंदाजी करताना दिसला.
सामन्याबद्दल सांगायचे झाल्यास बांगलादेशने नाणेफेक जिंकून प्रथम फलंदाजी करण्याचा निर्णय घेतला होता. या सामन्यात बांगलादेशचे नेतृत्व शाकिब अल हसन ऐवजी नजमुल हुसैन शान्तो करतोय. शाकिबला दुखापत झाल्याने तो या सामन्यातून बाहेर आहे.
तसेच बांगलादेशने प्लेइंग इलेव्हनमध्ये शाकिब ऐवजी नसुम अहमदला संधी देण्यात आली आहे. तसेच तस्किन अहमद ऐवजी हसन मेहमुदला प्लेइंग इलेव्हनमध्ये संधी देण्यात आली आहे.
त्याचबरोबर भारतीय संघाने मात्र, प्लेइंग इलेव्हनमध्ये कोणताही बदल केलेला नाही.
भारत - रोहित शर्मा (कर्णधार), शुभमन गिल, विराट कोहली, श्रेयस अय्यर, केएल राहुल (यष्टीरक्षक), हार्दिक पंड्या, रवींद्र जडेजा, शार्दुल ठाकूर, कुलदीप यादव, जसप्रीत बुमराह, मोहम्मद सिराज
बांगलादेश - लिटन दास, तन्झीद हसन, नजमुल हुसेन शान्तो (कर्णधार), मेहदी हसन मिराझ, तौहीद ह्रदोय, मुशफिकुर रहीम (यष्टीरक्षक), महमुदुल्ला, नसुम अहमद, हसन महमूद, मुस्तफिजुर रहमान, शरीफुल इस्लाम
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.