पणजी : हिमाचलच्या (Himachal) फलंदाजांनी गोव्याच्या (Goa) असाह्य गोलंदाजांवर हल्लाबोल चढवत दिवसभरातील 90 षटकांत 411 धावा नोंदविल्या. त्यामुळे कुचबिहार करंडक 19 वर्षांखालील चार दिवसीय सामन्याच्या दुसऱ्या दिवशीच त्यांनी लढतीवर घट्ट पकड बसविली. सूरत येथील खोलवड जिमखाना मैदानावर सुरू असलेल्या या सामन्याच्या दुसऱ्या दिवसअखेर मंगळवारी हिमाचलने पहिल्या डावात 5 बाद 550 धावा केल्या. काल पहिल्या दिवसअखेर त्यांनी बिनबाद 139 धावा केल्या होत्या. गोव्याला पहिल्या डावात फक्त 153 धावा करता आल्या होत्या. हिमाचलचा संघ आता 397 धावांनी आघाडीवर आहे.

हिमाचलच्या तिघा फलंदाजांनी शतके ठोकली. सलामीवीर आशू शर्मा याने 103 धावा केल्या. त्याने अनिमेश ठाकूर (60) याच्यासमवेत 163 धावांची सलामी दिली. मध्यफळीतील मृदूल सुरोच 183 धावांवर नाबाद आहे. कर्णधार वैभव कालता यानेही शतक केले असून तो 140 धावांवर नाबाद आहे. गोव्याने तब्बल आठ गोलंदाज वापरले. मृदूल व वैभव यांनी सहाव्या विकेटसाठी 317 धावांची अभेद्य भागीदारी केली आहे.

संक्षिप्त धावफलक

गोवा, पहिला डाव : 153

हिमाचल, पहिला डाव : (बिनबाद 139 वरून) 125 षटकांत 5 बाद 550 (आशू शर्मा 103, अनिमेश ठाकूर 60, मृदूल सुरोच नाबाद 183, वैभव कालता नाबाद 140, फरदीन खान 24-8-74-2, दीप कसवणकर 38-8-163-2, उदित यादव 19-1-65-1, लखमेश पावणे 21-2-74-0, मनीष काकोडे ११-१-५९-०, कौशल हट्टंगडी 6-1-15-0, आयुष वेर्लेकर 4-0-36-0, देवनकुमार चित्तेम 2-0-24-0).