Hardik Pandya International Cricket Comeback 2026: टीम इंडियाचा सुपरस्टार अष्टपैलू खेळाडू हार्दिक पांड्या गेल्या काही दिवसांपासून दुखापतीमुळे क्रिकेटच्या मैदानापासून दूर आहे. गेल्या काही महिन्यांत फक्त आयपीएल ट्रेडच्या चर्चांमध्येच त्याचे नाव सातत्याने समोर येत होते. मात्र, आता हार्दिकच्या चाहत्यांसाठी एक अत्यंत आनंदाची आणि मोठी बातमी समोर आली. आयसीसी टी-20 वर्ल्ड कपनंतर पांड्या आता पुन्हा एकदा टीम इंडियाच्या निळ्या जर्सीमध्ये मैदानात जलवा दाखवण्यासाठी सज्ज झाला असून तो लवकरच आंतरराष्ट्रीय क्रिकेटमध्ये पुनरागमन करणार आहे.

'टाइम्स ऑफ इंडिया'च्या ताज्या अहवालानुसार, पांड्या आगामी अफगाणिस्तानविरुद्धच्या टी-20 मालिकेतून टीम इंडियात पुनरागमन करण्याची दाट शक्यता आहे. भारत आणि अफगाणिस्तान यांच्यातील ही महत्त्वपूर्ण टी-20 मालिका 13 सप्टेंबर 2026 पासून सुरु होणार असून, या मालिकेतील सर्व सामने दिल्लीच्या अरुण जेटली स्टेडियमवर खेळवले जाणार आहेत.

अफगाणिस्तानविरुद्धच्या या मालिकेत दमदार कामगिरी करुन पांड्या एशियन गेम्स 2026च्या संघातही स्वतःचा दावा मजबूत करण्याचा प्रयत्न करेल. सध्या एशियन गेम्सच्या प्राथमिक संघात त्याला स्थान मिळालेले नाही, परंतु काही खेळाडूंच्या दुखापतींमुळे आगामी काळात त्या संघात मोठे बदल होऊ शकतात, ज्याचा फायदा हार्दिकला मिळू शकतो. आयपीएल 2026 मधील हार्दिकची कामगिरी फारशी समाधानकारक झाली नव्हती, त्यामुळे या पुनरागमनाच्या मालिकेत बॅट आणि बॉल दोन्हीने चमकदार कामगिरी करुन टीकाकारांना चोख उत्तर देण्याचा त्याचा मानस असेल.

हार्दिक पांड्या (Hardik Pandya) हा टीम इंडियासाठी नेहमीच एक मोठा मॅच विनर खेळाडू राहिला आहे, यामुळेच संघ व्यवस्थापन आणि निवड समिती त्याच्या फिटनेसबाबत नेहमीच चिंतेत असते. सध्या फिटनेससोबतच हार्दिकचा फॉर्म हा देखील टीम इंडियासाठी चिंतेचा विषय बनला आहे. आगामी आयसीसी वनडे वर्ल्ड कप 2027च्या दृष्टीने हार्दिक पांड्या हा भारताचा अत्यंत महत्त्वाचा कणा मानला जात आहे. अशा परिस्थितीत हार्दिकचे संघात परतणे आणि त्याने लवकरात लवकर फॉर्मात येणे संघाच्या संतुलनासाठी अत्यंत गरजेचे आहे. या कमबॅक मालिकेत त्याच्या कामगिरीवर संपूर्ण क्रिकेट विश्वाचे लक्ष लागून राहणार आहे