पणजी : अतिशय रोमहर्षक ठरलेल्या सामन्यात बदली स्पॅनिश खेळाडू आयराम काब्रेरा याच्या हॅटट्रिकमुळे एफसी गोवाने पिछाडीवरून मुसंडी मारली, पण नंतर अखेरच्या दोन मिनिटांत दोन गोल स्वीकारल्यामुळे केरळा ब्लास्टर्सने त्यांना आठव्या इंडियन सुपर लीग (आयएसएल) फुटबॉल स्पर्धेत 4-4 असे गोल करत बरोबरीत रोखले. सामना रविवारी बांबोळी येथील ॲथलेटिक स्टेडियमवर झाला. (FC Goa won 10 matches against Kerala Blasters)

शेवटच्या साखळी सामन्यातील बरोबरीसह एफसी गोवाने (FC Goa) आयएसएल फुटबॉल स्पर्धेत केरळा ब्लास्टर्सविरुद्ध सलग दहा सामने अपराजित राहण्याचा पराक्रम साधला. दोन्ही संघांची स्पर्धेच्या आठव्या मोसमातील मोहीम संपली. केरळा ब्लास्टर्सची (Kerala Blasters) कालच उपांत्य फेरीतील जागा निश्चित झाली होती. स्पर्धेतील सातव्या बरोबरीमुळे त्यांचे 20 सामन्यांतून 34 गुण झाले व चौथा क्रमांक कायम राहिला. एफसी गोवानेही स्पर्धेत सातवी बरोबरी नोंदविली. 20 लढतीनंतर 19 गुणांसह ते नवव्या क्रमांकावर राहिले.

अर्जेंटिनाचा (Argentina) जोर्जे परेरा डायझ याने 10व्या मिनिटास व नंतर 25व्या मिनिटास पेनल्टी फटक्यावर केलेल्या गोलमुळे केरळा ब्लास्टर्स विश्रांतीला 2-0 फरकाने आघाडीवर होता. तेच सामना जिंकणार असे चित्र होते. मात्र बदली खेळाडू या नात्याने मैदानात उतरलेल्या आयराम काब्रेरा याने कमाल केली. त्याने 49व्या मिनिटास आणि नंतर 63व्या मिनिटास पेनल्टीवर गोल करून एफसी गोवास 2-2 अशी बरोबरी साधून दिली. 79व्या मिनिटास बदली खेळाडू ऐबान डोहलिंग याने केलेल्या लाजवाब गोलमुळे एफसी गोवास 3-2 अशी, तर नंतर 82व्या मिनिटास काब्रेराने हॅटट्रिक साधल्यामुळे एफसी गोवास 4-2 अशी आघाडी मिळाली. मात्र 88व्या मिनिटास व्हिन्सी बार्रेटो व 90व्या मिनिटास स्पॅनिश (Spanish) अल्वारो वाझकेझ याने केलेल्या गोलमुळे केरळा ब्लास्टर्सने पराभव टाळत बरोबरीचा गुण प्राप्त केला. हे दोन्ही खेळाडू बदली या नात्याने उत्तरार्धात मैदानात आले होते.

‘शिल्ड’साठी आज लढत

फातोर्डा (Fatorda) येथील पंडित जवाहरलाल नेहरू स्टेडियमवर (Pandit Jawaharlal Nehru Stadium) सोमवारी (ता. 7) जमशेदपूर एफसी व एटीके मोहन बागान यांच्यातील सामना लीग विनर्स शिल्डचा मानकरी ठरविणार आहे. गुणतक्त्यात अव्वल स्थान मिळविणारा संघ शिल्डचा मानकरी ठरेल व पुढील मोसमातील एएफसी चँपियन्स लीग (AFC Champions League) स्पर्धेसाठी पात्र ठरेल. सलग सहा सामने जिंकलेला जमशेदपूर एफसी संघ (Jamshedpur FC team) 40 गुणांसह अव्वल स्थानी आहे, तर ओळीने 15 सामने अपराजित राहून आयएसएल विक्रमाशी बरोबरी साधणारा एटीके मोहन बागान संघ 37 गुणांसह तिसऱ्या क्रमांकावर आहे.