Goa: एफसी गोवा (FC Goa) डेव्हलपमेंटल संघाने गोवा प्रोफेशनल लीग (Goa Pro League) फुटबॉल स्पर्धेतील (Football Tournament) अपराजित मालिका कायम राखताना शनिवारी वास्को स्पोर्टस क्लबला (Vasco Sports Club) गोलशून्य बरोबरीत रोखले. सामना म्हापसा येथील धुळेर स्टेडियमवर झाला.

अनुभवी गोलरक्षक लुईस बार्रेटो याच्या दक्ष कामगिरीमुळे एफसी गोवा संघाच्या आक्रमणांना यश मिळाले नाही. त्यामुळे माजी विजेत्यांना बरोबरीच्या एका गुणावर समाधान मानावे लागले.

सामन्याच्या सुरवातीच्या अर्ध्या तासाच्या खेळात एफसी गोवाच्या ज्योवियल डायस व ब्रिसन फर्नांडिस यांनी वास्को क्लबच्या गोलक्षेत्रात धडक मारली होती, परंतु गोलरक्षक बार्रेटोस चकवा देणे त्यांना शक्य झाले नाही. ३६व्या मिनिटास बार्रेटोने डावीकडे झेपावत ज्योवियलचा आणखी एक प्रयत्न उधळून लावला. त्यामुळे पूर्वार्धाअखेरीस गोलशून्य बरोबरीची कोंडी कायम राहिली. सामन्याच्या शेवटच्या पंधरा मिनिटांच्या खेळात एफसी गोवाने गोलसाठी जोरदार आक्रमणे केली, परंतु लुईस बार्रेटोने एकाग्रता ढळू दिली नाही. डेल्टन कुलासो व ब्रिटो परेरा यांचे धोकादायक फटके रोखताना लुईसने सारा अनुभव पणास लावला.