पणजी: दिल्लीत सुरू असलेल्या राष्ट्रीय पातळीवरील सुब्रतो कप 17 वर्षांखालील फुटबॉल स्पर्धेत गोव्याचे प्रतिनिधित्व करणाऱ्या व्ही. धेंपो उच्च माध्यमिक विद्यालयाने धडाकेबाज विजय नोंदविला.

(Dempo Higher Secondary School well played in Subroto Cup under 17 football tournament)

धेंपो उच्च माध्यमिकने मंगळवारी मध्य प्रदेशमधील केबीएचएस स्कूलवर 6-0 अशी एकतर्फी मात केली. काल स्पर्धेत धेंपो उच्च माध्यमिक विद्यालयाने मणिपूरमधील संघाला बरोबरीत रोखले होते. त्यांचे आता दोन लढतीनंतर चार गुण झाले आहेत. बुधवारी मेघालयातील संघाविरुद्ध शेवटचा साखळी सामना होईल. ती लढत जिंकल्यास धेंपो उच्च माध्यमिकला बाद फेरीची संधी राहील, असे शारीरिक शिक्षण शिक्षक चेतन कवळेकर यांनी सांगितले.

धेंपो उच्च माध्यमिक विद्यालयाच्या विजयात मर्फी फर्नांडिस याने दोन गोल केले. त्याने अनुक्रमे 27 व 59 व्या मिनिटास गोल नोंदविला. याशिवाय मॅकनेल डायस (12वे), रौनक वळवईकर (23वे), तपन मिंज (25वे) व उत्कर्ष कुडाळकर (55 वे मिनिट) यांनी प्रत्येकी एक गोल केला.