Delhi Arun Jaitley Stadium renovation before World Cup 2023: आंतरराष्ट्रीय क्रिकेट परिषदेने मंगळवारी (27 जून) भारतात होणाऱ्या वर्ल्डकप 2023 स्पर्धेचे वेळापत्रक जाहीर केले आहे. या वर्ल्डकपमधील 48 सामने 5 ऑक्टोबर ते 19 नोव्हेंबर दरम्यान भारतातील 10 शहरात खेळवले जाणार आहेत. यामध्ये दिल्लीतील अरुण जेटली स्टेडियमचाही समावेश आहे.

दिल्लीतील अरुण जेटली स्टेडियमवर वर्ल्डकप 2023 मधील 5 सामने खेळवले जाणार आहेत. पण त्यापूर्वी या स्टेडियममध्ये अनेक सुधारणा करणे गरजेचे आहे. त्यासाठी 20 ते 25 कोटी रुपये खर्च करण्यात येणार असल्याची सध्या क्रिकेट वर्तुळात चर्चा आहे.

याच स्टेडियमवर यावर्षी फेब्रुवारीमध्ये झालेल्या भारत विरुद्ध ऑस्ट्रेलिया कसोटी सामन्यावेळी प्रेक्षकांकडून स्टेडियममधील असुविधांबद्दल तक्रारी आल्या होत्या. तसेच स्टेडियममधील असुविधांबद्दल मोठ्या प्रमाणात टीकाही झाली होती.

त्यानंतर मीडियातील रिपोर्ट्सनुसार एप्रिलमध्ये असे सांगण्यात आले होते की हैदराबाद, कोलकाता, मुंबई, मोहाली आणि दिल्ली येथील स्टेडियममध्ये सुधारणा करण्याची गरज आहे. दरम्यान, मोहालीमध्ये एकही वर्ल्डकप सामना ठेवण्यात आलेला नाही.

दरम्यान, दिल्ली आणि जिल्हा क्रिकेट असोसिएशनचे संयुक्त सचिव रजत मनचंदा यांनी बीसीसीआयेच वर्ल्डकप सामन्यांचे आयोजन दिल्याबद्दल आभार मानले आहेत. तसेच त्यांनी सांगितले आहे की वर्ल्डकपदरम्यान प्रेक्षकांचा अनुभव चांगला राहण्याच्या दृष्टीने प्रयत्न करणार आहे.

याशिवाय त्यांनी सांगितले आहे की स्टेडियममधील जवळपास 10 हजार आसने बदलली जातील, तसेच नवीन वॉशरुम, चांगले जेवण आणि पाणी यांचीही सुविधा करण्यात येईल. तसेच हाऊसकिपिंग स्टाफही वाढवण्यात येईल.

दरम्यान, वर्ल्डकप 2023 स्पर्धेचे सामने दिल्लीशिवाय हैदराबाद, अहमदाबाद, धरमशाला, चेन्नई, लखनऊ, पुणे, बंगळुरू, मुंबई आणि कोलाकाता या 10 शहरांमध्ये होणार आहेत. तसेच गुवाहाटी, तिरुअनंतपुरम आणि हैदराबाद येथे 29 सप्टेंबर ते 3 ऑक्टोबर दरम्यान सराव सामने होणार आहेत.

मुख्य स्पर्धेतील सामने ज्या 10 शहरात होणार आहेत, त्यातील केवळ हैदराबादला 3 सामने होणार आहेत. त्याव्यतिरिक्त अन्य सर्व 9 शहरात 5 सामने आयोजित करण्यात आले आहेत.