I-League Football Tournament: आय-लीग फुटबॉल स्पर्धेत लागोपाठ दोन सामने गमावलेल्या चर्चिल ब्रदर्सची गाडी रविवारी विजयासह रुळावर आली. वास्को येथील टिळक मैदानावर त्यांनी मणिपूरच्या नेरोका एफसीवर 4-1 फरकाने शानदार विजय नोंदवला. सामन्याच्या पहिल्या अर्ध्या तासातील खेळात तीन गोलची आघाडी घेतलेल्या चर्चिल ब्रदर्सला रोखणे इंफाळ येथील संघाला अवघड ठरले.

दरम्यान, फैझल अली याने अनुक्रमे 9व्या आणि 15व्या मिनिटास गोल केल्यानंतर 32व्या मिनिटास स्टेन्डली फर्नांडिस याने माजी विजेत्यांची स्थिती भक्कम केली. 47व्या मिनिटास अन्सुमाना क्रोमा याने पाहुण्या संघाची पिछाडी कमी केली, मात्र नंतर त्यांना चर्चिल ब्रदर्सची आघाडी भेदणे शक्य झाले नाही.

तसेच, रिकार्डो डिचियारा याने 90+4 व्याने मिनिटास संघाच्या विजयावर शिक्कामोर्तब करणारा गोल केला. चर्चिल ब्रदर्सचा हा नऊ सामन्यांतील तिसरा विजय ठरला. अन्य दोन बरोबरी व चार पराभवांसह त्यांचे आता 11 गुण झाले आहेत. नेरोका एफसीला सहावा पराभव पत्करावा लागला. त्यामुळे नऊ लढतीनंतर त्यांचे सात गुण कायम राहिले.