I-League Football माजी विजेता चर्चिल ब्रदर्स संघ यावेळच्या आय-लीग फुटबॉल स्पर्धेत पुन्हा विजयपथावर आला. लागोपाठ दोन सामन्यांत पराभूत झाल्यानंतर बुधवारी त्यांनी दुबळ्या टिड्डिम रोड ॲथलेटिक युनियन (ट्राऊ) संघावर ४-० असा एकतर्फी विजय नोंदविला. सामना वास्को येथील टिळक मैदानावर झाला.
चर्चिल ब्रदर्स संघ पूर्वार्धात दोन गोलने आघाडीवर होता. अर्जेंटिनाच्या रिकार्डो डिचियारा याने १८व्या, तर रिचर्ड कॉस्ता याने ३३व्या मिनिटास गोल नोंदविला. नंतर ६९व्या मिनिटास पेनल्टी फटक्यावर नायजेरियन ओगाना लुईस संघाची आघाडी वाढविली.
८३व्या मिनिटास अर्जेंटिनाच्या एमिलियानो टोर्रे याने चर्चिल ब्रदर्सच्या विजयावर शिक्कामोर्तब करणारा गोल केला. राजस्थान युनायटेड व इंटर काशी संघाविरुद्ध पराभूत झालेल्या चर्चिल ब्रदर्स संघाला बुधवारच्या विजयामुळे दिलासा मिळाला.
त्यांचा हा पाच लढतीतील दुसरा विजय असून सात गुणांसह ते आठव्या क्रमांकावर आहेत. चर्चिल ब्रदर्सचा स्पर्धेतील पुढील सामना रविवारी (ता. २६) अवे मैदानावर गोकुळम केरळा संघाविरुद्ध होईल.
मणिपूरच्या ट्राऊ संघाला सलग पाचवा पराभव पत्करावा लागला. त्यामुळे सहा सामने खेळल्यानंतर इंफाळचा संघ एका गुणासह शेवटच्या १३व्या क्रमांकावर कायम राहिला. दिल्ली एफसीला पहिल्या सामन्यात बरोबरी नोंदविल्यानंतर ट्राऊ संघाने पाच सामने गमावले आहेत.
शिलाँग लाजाँग विजयी
स्पर्धेत बुधवारी मेघालयातील शिलाँग येथे झालेल्या सामन्यात शिलाँग लाजाँग एफसीने दिल्ली एफसीवर 2-1 फरकाने विजय नोंदविला. शिलाँगच्या संघासाठी करीम सांब व फ्रांग्की बुआम यांनी प्रत्येकी एक गोल नोंदविला.
दिल्ली एफसीसाठी गौरव रावत याने गोल केला. शिलाँग लाजाँगचे आता पाच लढतीतून नऊ गुण झाले असून स्पर्धेतील दुसऱ्या पराभवामुळे दिल्लीचे सात गुण कायम राहिले.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.