Asian Champions Trophy Hockey Tournament Schedule announced: भारतात यावर्षी हिरो एशियन चॅम्पियन्स ट्रॉफी 2023 ही हॉकी स्पर्धा खेळवण्यात येणार आहे. चेन्नईमध्ये ही स्पर्धा 3 ते 12 ऑगस्टदरम्यान पार पडणार आहे. या स्पर्धेचे वेळापत्रक नुकतेच आशियाई हॉकी महासंघाने घोषित केले आहे.

या स्पर्धेतील पहिला सामना कोरिया आणि जपान यांच्यात खेळला जाईल. तसेच पहिल्याच दिवशीच्या तिसऱ्या सामन्यात भारतीय संघ चीनविरुद्ध मैदानात उतरेल. हा सामना महापौर राधाकृष्णन हॉकी स्टेडियमवर होणार आहे.

या स्पर्धेत एकूण सहा संघ सहभागी होणार आहेत. यामध्ये भारतीय संघासह कोरिया, मलेशिया, पाकिस्तान, जपान आणि चीन या संघांचा समावेश आहे. हे सर्व संघ साखळी फेरीत खेळणार आहेत.

साल 2021 मध्ये पार पडलेल्या एशियन चॅम्पियन्स ट्रॉफी स्पर्धेत दक्षिण कोरियाने विजेतेपद जिंकले होते. तसेच आत्तापर्यंत भारताने 2011, 2016 आणि 2018 या तीन वर्षी विजेतेपदाला गवसणी घातली आहे. याशिवाय पाकिस्तानने 2012, 2013 आणि 2018 या तीन वर्षी विजेतपद मिळवले. त्यामुळे भारत आणि पाकिस्तान या स्पर्धेतील सर्वात यशस्वी संघ आहेत.

भारत विरुद्ध पाकिस्तान

दरम्यान, या स्पर्धेत भारत आणि पाकिस्तान हे दोन कट्टर प्रतिस्पर्धीही आमने-सामने येणार आहेत. भारत आणि पाकिस्तान संघात 9 ऑगस्टला सामना होणार आहे. या सामन्याला भारतीय प्रमाणवेळेनुसार संध्याकाळी 8.30 वाजता सुरुवात होणार आहे. हा भारताचा अखेरचा साखळी सामना असणार आहे.

भारताचे सामने

भारतीय संघ साखळी फेरीत चीननंतर 4 ऑगस्टला जपानविरुद्ध, 6 ऑगस्टला मलेशियाविरुद्ध खेळणार आहे. तसेच 7 ऑगस्ट रोजी कोरियाशी भारताची लढत होणार आहे.

असे आहे भारताचे वेळापत्रक

• 3 ऑगस्ट - भारत विरुद्ध चीन (वेळ - रात्री 8.30 वा.)

• 4 ऑगस्ट - भारत विरुद्ध जपान (वेळ - रात्री 8.30 वा.)

• 6 ऑगस्ट - भारत विरुद्ध मलेशिया (वेळ - रात्री 8.30 वा.)

• 7 ऑगस्ट - भारत विरुद्ध कोरिया (वेळ - रात्री 8.30 वा.)

• 9 ऑगस्ट - भारत विरुद्ध पाकिस्तान (वेळ - रात्री 8.30 वा.)