Asia Cup 2023 Final Equations:

आशिया चषक 2023 स्पर्धेतील सुपर फेरीतील सामने सध्या कोलंबोमध्ये रंगत आहेत. सुपर फोरमधील गुणतालिकेत पहिल्या दोन क्रमांकावर राहणारे संघ अंतिम सामन्यात प्रवेश करणार आहेत.

दरम्यान, भारतीय संघाने मंगळवारी श्रीलंकेविरुद्ध 41 धावांनी विजय मिळवत पहिल्या दोनमध्ये स्थान पक्के करत अंतिम सामन्यातील प्रवेश निश्चित केला आहे. त्यामुळे आता अंतिम सामन्यात पोहचण्यासाठी एकच जागा शिल्लक असून त्यासाठी पाकिस्तान आणि श्रीलंका हे दोन दावेदार आहेत.

भारताने सुपर फोरमध्ये पाकिस्तान आणि श्रीलंका या दोन्ही संघांना पराभूत करत 4 गुण मिळवले आहेत. सध्या भारत गुणतालिकेत अव्वल क्रमांकावर आहे.

तसेच श्रीलंका आणि पाकिस्तान हे दोन संघ प्रत्येकी 2 गुणांसह दुसऱ्या आणि तिसऱ्या क्रमांकावर आहेत. या दोन्ही संघांनी एक विजय आणि एक पराभव स्विकारला आहे.

त्याचबरोबर सुपर फोरमधील पहिले दोन्ही सामने पराभूत होणारा बांगलादेश संघ चौथ्या क्रमांकावर आहे.

दरम्यान, बांगलादेश अंतिम सामन्यात पोहण्याच्या शर्यतीतून बाहेर झाला आहे. त्यामुळे भारत आणि बांगलादेश यांच्यात 15 सप्टेंबरला होणारा सुपर फोरचा अखेरचा सामना गुणतालिकेत मोठा बदल घडवणार नाही आणि निर्णायक ठरणार नाही.

पण 14 सप्टेंबरला होणारा पाकिस्तान विरुद्ध श्रीलंका हा सामना अंत्यंत महत्त्वाचा ठरणार आहे. याच सामन्यावर या दोन्ही संघांचे स्पर्धेतील भवितव्य ठरणार आहे.

कसे आहे समीकरण?

श्रीलंका आणि पाकिस्तान संघात 14 सप्टेंबर रोजी होणाऱ्या सामन्यात विजय मिळवणारा संघ भारताविरुद्ध अंतिम सामना खेळणार आहे. कारण विजय मिळवणाऱ्या संघाचे 4 गुण होणार आहेत. त्यामुळे तो संघ पहिल्या दोन क्रमांकात स्थान मिळवेल.

मात्र, 14 तारखेला कोलंबोमध्ये पावसाची शक्यताही आहे. त्यामुळे जर पावसामुळे हा सामना झाला नाही किंवा सामना रद्द झाला, तर श्रीलंका आणि पाकिस्तानला विभागून 1 गुण देण्यात येणार आहे. असे झाल्यास श्रीलंका नेट रनरेटच्या जोरावर पाकिस्तानला मागे टाकून अंतिम सामन्यात प्रवेश करेल. तर पाकिस्तान तिसऱ्या क्रमांकावर राहिल.

अंतिम सामना

आशिया चषक 2023 स्पर्धेचा अंतिम सामना 17 सप्टेंबर, रविवारी होणार आहे. हा सामना कोलंबोमधील आर प्रेमदासा स्टेडियमवर होणार आहे.