Rohit Sharma Post After India vs Sri Lanka Match:
आशिया चषक 2023 स्पर्धेतील सुपर फोर फेरीत मंगळवारी कोलंबोला झालेल्या सामन्यात भारताने श्रीलंकेविरुद्ध 41 धावांनी विजय मिळवला. या विजयाबरोबरच भारताने अंतिम सामन्यात प्रवेश केला आहे. या विजयानंतर भारताचा कर्णधार रोहित शर्माने केलेले ट्वीट चांगलेच चर्चेत आले.
भारताने 24 तासात दोन मोठे विजय मिळवल्यानंतर आता विश्रांती घेण्याची वेळ असल्याचे रोहितने त्याच्या ट्वीटमधून म्हटले आहे.
भारताने आशिया चषकाच्या सुपर फोर फेरीत सोमवारी पाकिस्तानला 228 धावांनी पराभूत केले होते, त्यानंतर लगेचच मंगळवारी श्रीलंकेलाही पराभूत केले.
खरंतर भारत आणि पाकिस्तान यांच्यातील सामना रविवारी सुरू झाला होता. मात्र, रविवारी पावसाचा मोठा व्यत्यय आल्याने सोमवारी राखीव दिवशी हा सामना पूर्ण करण्यात आला होता. त्यामुळे भारतीय संघ सलग तीन दिवस मैदानात उतरला होता.
याचबद्दल रोहित शर्माने त्याच्या ट्वीटमधून आठवण करून दिली आहे, त्याने ट्वीट केले की '3 दिवस, 2 सामने, 2 विजय. गुड नाईट.'
दरम्यान, रोहित शर्मा या दोन्ही सामन्यात चांगला खेळला आहे. त्याने दोन्ही सामन्यात सलामीला खेळताना ताबडतोड अर्धशतक झळकवले. पाकिस्तानविरुद्ध रोहितने 56 धावांची खेळी केली, तर श्रीलंकेविरुद्ध डावात सर्वोच्च 53 धावांची खेळी केली होती. तो या स्पर्धेत सध्या सर्वाधिक धावा करणाराही फलंदाज आहे.
श्रीलंकेविरुद्धच्या सामन्याबद्दल सांगायचे झाल्यास भारताने प्रथम फलंदाजी करताना 49.1 षटकात सर्वबाद 213 धावा केल्या. भारताकडून रोहित व्यतिरिक्त केवळ इशान किशन आणि केएल राहुल यांनाच 30 धावांचा टप्पा पार करता आला. इशानने 33 धावांची खेळी केली, तर केएल राहुलने 39 धावांची खेळी केली. श्रीलंकेकडून दुनिथ वेलालागेने सर्वाधिक 5 विकेट्स घेतल्या.
त्यानंतर 214 धावांच्या आव्हानाचा पाठलाग करताना श्रीलंकेचा डाव 41.3 षटकात 172 धावांवर संपुष्टात आला. श्रीलंकेकडून फलंदाजीवेळीही वेलालागेने सर्वाधिक 42 धावांनी नाबाद खेळी केली. भारताकडून कुलदीप यादवने सर्वाधिक 4 विकेट्स घेतल्या.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
