कोकण रेल्वेच्या रत्नागिरीतील दिवाणखवटी येथे दरड कोसळल्याने वाहतूक खोळंबली. रविवारी सायंकाळी पाचच्या सुमारास ही घटना घडल्याने अनेक ट्रेन्स रद्द करण्यात आल्या.

गोव्यातील मालपे बोगद्यात घटना घडल्यानंतर चारच दिवसांत दुसऱ्यांदा कोकण रेल्वे मार्गावर दरड कोसळल्याने वाहतूक ठप्प झाली.

घटना घडल्यानंतर कोकण रेल्वेच्या वतीने तात्काळ माती हटविण्यासाठी प्रयत्न सुरु केले. घटनास्थळी जेसीबी आणून मार्ग मोकळा करण्याचे काम सुरु झाले.

मार्ग मोकळा करण्याचे काम दुसऱ्या दिवशी दुपारी देखील सुरु असून, अद्याप रेल्वे वाहतूक ठप्पच आहे.

मार्गावर दरड कोसळल्याचा रेल्वे वाहतुकीला फटका बसला असून, अनेक गाड्या रद्द करण्यात आल्या तर काही इतर मार्गांनी वळविण्यात आल्या.

विविध स्थानकांवर थांबलेल्या रेल्वे गाड्यातील प्रवाशांना वाहतूक सुरळीत होण्याची वाट पाहत रेल्वे स्थानकावरच थांबावे लागले.

अखेर मुंबईच्या दिशेने जाणाऱ्या प्रवाशांसाठी प्रशासनाच्या वतीने एसटी बसची व्यवस्था केली व प्रवाशांना दुसऱ्या ठिकाणी हलविण्यात आले.