उत्तर प्रदेशातील प्रयागराज येथे महाकुंभमेळा सुरू झाला आहे. या महाकुंभात देशाच्या कानाकोपऱ्यातून आणि परदेशातून साधू आणि संत आले आहेत. महाकुंभमेळ्यात असे अनेक बाबा आले आहेत, जे भक्तांचे लक्ष वेधून घेत आहेत.

आयआयटी बाबा

आयआयटी बाबा सध्या सर्वाधीक चर्चेत आहेत. त्यांच्या चर्चेमागे एक विशेष कारण आहे. या बाबांनी अभियांत्रिकी ते निवृत्तीपर्यंतचा प्रवास केला आहे. बाबा आयआयटी मुंबईचे पदवीधर आहेत. आयआयटी मुंबईमधून एरोस्पेस आणि एरोनॉटिकल इंजिनिअरिंगचे शिक्षण घेतल्यानंतर या बाबांनी सन्यास घेतला.

राधे पुरी बाबा

मध्य प्रदेशातील उज्जैन येथून हे बाबा प्रयागराजला आले आहेत. ते त्यांच्या कठोर तपश्चर्येमुळे धार्मिक आकर्षणाचे केंद्र बनले आहे. राधे पुरी बाबा २०११ पासून जगाच्या कल्याणासाठी आपला उजवा हात वर करून राहत आहेत. बाबांच्या या तपश्चर्येला हठयोग म्हणतात.

कबुतर बाबा

राजस्थानच्या चित्तौडगड येथून हे बाबा प्रयागराजला पोहोचले आहेत. गेली अनेक वर्षे ते डोक्यावर कबुतर घेऊन फिरत आहेत. एका कबुतराने तर 9 वर्षांपासून त्यांच्या डोक्यावर तळ ठोकला असं सांगितलं जातं. बाबांचे हे अनोखे रूप सर्वांचे लक्ष वेधून घेत आहे.

अ‍ॅम्बेसेडर बाबा

या बाबांना राजदूत नागा बाबा म्हणून ओळखले जाते. बाबांचे वैशिष्ट्य म्हणजे त्यांच्याकडे असलेली १९७३ ची जुनी भगव्या रंगाची अ‍ॅम्बेसेडर कार आहे, जी अगदी व्यवस्थित चालू स्थितीत आहे. बाबा जिथे जातात तिथे ते आपली कार घेऊन जातात.

अनाज वाले बाबा

यूपीच्या सोनभद्र जिल्ह्यातील रहिवासी असलेल्या अमरजीत बाबांनी आपल्या डोक्यावर गहू, बाजरी, हरभरा आणि वाटाणा पिकवला आहे. हे साधू बाबा हठ योगाचा सराव करण्यासाठी प्रसिद्ध आहेत. पर्यावरण जागृतीचा संदेश देण्यासाठी ते त्यांच्या डोक्यावरच पिके उगवतात.