कुंडई येथे उतरणीवर शुक्रवार, 21 रोजी झालेल्या अपघातात फोंड्यातील युवक ठार झाला. मृत युवकाचे नाव शौनक दिलीप नाईक (24) असे असून तो दुर्गाभाट-फोंडा येथील पुष्पकमल हाउसिंग सोसायटीत राहात होता.

शौनक नाईक हा दोन महिन्यांपूर्वीच कुंडई येथील औद्योगिक वसाहतीमधील एका कंपनीत कामाला लागला होता. कामावरून सुटल्यानंतर घरी परतताना शुक्रवारी सायंकाळी 5 वाजण्याच्या सुमारास त्याला कुंडई येथे अपघात झाला.

रस्त्यावर सांडलेल्या तेलावरून त्याची जीए ०५ क्यू ५५९० या क्रमांकाची दुचाकी घसरली आणि तो रस्त्यावर फेकला गेला. यावेळी त्याच्या डोक्याला गंभीर दुखापत झाली. त्याला लागलीच गोमेकॉत उपचारासाठी दाखल केले.

मात्र, (शनिवारी) सकाळी ६.४५ वाजण्याच्या दरम्यान उपचार सुरू असतानाच त्याचा मृत्यू झाला. शौनक हा नाईक कुटुंबातील एकुलता एक मुलगा होता. त्याच्या वडिलांचे सामाजिक क्षेत्रात उल्लेखनीय कार्य आहे.

मनमिळाऊ स्वभावाचा शौनक परिसरातील सर्वांच्या परिचयाचा होता. दुपारी त्याच्या पार्थिवावर फोंड्यात अंत्यसंस्कार करण्यात आले. यावेळी फोंडा शहरातील लोक मोठ्या संख्येने उपस्थित होते.