Goa Crime News
मडगाव: कोलवा पोलिस स्‍थानकाच्‍या हद्दीत पुन्हा एकदा वादावादीतून मारहाणीची घटना घडली असून काल कोलवा येथे वादावादीतून रेमी फर्नांडिस या युवकाला काही युवकांच्‍या गटाकडून जबर मारहाण करून त्‍याचे अपहरण करण्‍याची घटना घडली. या युवकाला जबरदस्‍त मारहाण करून नंतर अर्धमेल्‍या अवस्‍थेत त्‍याला बाणावली येथील मारिया हॉलजवळ सोडून देण्‍यात आल्‍याची तक्रार पोलिसात नोंद केली आहे.
या प्रकरणात पोलिस दफ्‍तरी हिस्‍ट्रीशिटर म्‍हणून नाव नोंद असलेला कुख्‍यात गुंड वॉल्‍टर फर्नांडिस आणि त्‍याच्‍या साथीदाराचा समावेश असून सध्‍या हे गुंड फरार झाल्‍याची माहिती प्राप्‍त झाली आहे. कोलवा पोलिस त्‍यांच्‍या शोधात आहेत. संशयितांच्‍या विरोधात पोलिसांनी गुन्हा नोंद करण्‍यात आला आहे. पोलिस निरीक्षक रितेश तारी हे तपास करीत आहेत.
या प्रकरणाची माहिती अशी की, गुरुवारी पहाटे ४ वाजण्‍याच्‍या सुमारास हा प्रकार घडला. कोलवा येथे मार्गारेटा क्‍लब येथे पार्टी चालू असताना काहीजणांमध्‍ये वाद चालू झाला. त्‍यानंतर त्‍यातील रेमी फर्नांडिस हा युवक बाहेर आला असता स्‍थानिक गुंड वॉल्‍टर फर्नांडिस आणि त्‍याच्‍या साथीदाराने त्‍याला लाथाबुक्‍क्‍यांनी मारहाण करण्‍यास सुरुवात केली. त्‍यानंतर एका काळ्‍या रंगाच्‍या गाडीत घालून त्‍याचे अपहरण केले. पुन्हा त्‍याला मारहाण करून नंतर बाणावली येथील मारिया हॉलजवळ सकाळी ७.३० वाजण्‍याच्‍या सुमारास सोडून देण्‍यात आले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.