Sanguem Youth Drowned: सोमवारी मैनापी धबधब्यात बुडून दोघांचा मृत्यू, त्यानंतर मंगळवारी एका 16 वर्षीय युवकाचा चिरेखाणीत बुडून मृत्यू झालेल्या काही तास उलटत नाहीत तोपर्यंत बुडून मृत्यू होण्याची आणखी एक घटना समोर आली आहे. कुर्पे सांगे येथे सर्वेश वाडेकर (वय 21) या तरूणाचा बुडून मृत्यू झाला आहे.

वाडेकर याचा मृत्युदेखील खाणीतील पाण्यात बुडून झाला आहे. मंगळवारी सायंकाळी सातच्या सुमारास ही दुर्घटना घडल्याचे सांगण्यात येत आहे. वाडेकर याचा मृतदेह अद्याप आढळून आलेला नाही. तथापि, घटनास्थळावरून त्याचे चप्पल आणि कपडे आढळून आले आहेत. दरम्यान, हा अपघात आहे आत्महत्या याचा शोध पोलिस घेत आहेत.

कुर्पे गावातील खाणीत पावसामुळे पाणी भरले आहे. कुडचडे अग्निशमन दलाच्या जवानांनी येथे पाण्यात शोध घेतला, तथापि त्यांना मृतदेह आढळून आलेला नाही. रात्र झाल्याने शोध थांबवण्यात आला. उद्या सकाळी शोधमोहिम पुन्हा सुरू केली जाणार आहे.

सर्वेश वाडेकर याची मनस्थिती गेले काही दिवस चांगली नव्हती, असे सांगितले जात आहे. आज सायंकाळी साडे सहा वाजता तो कुणालाही न सांगता घराबाहेर पडला. त्यानंतर बराच वेळ तो घरी न परतल्याने त्याचा शोध घ्यायला सुरवात झाली. यावेळी खाणीजवळ त्याचे कपडे आणि चप्पल आढळून आले.