Mapusa: 70 फूट खोल विहिरीत पडला वृद्ध; अग्निशमन दलाच्या जवानांनी वाचवला जीव

Mapusa: कारोणा-हळदोणा येथे तोल जाऊन 70 फूट खोल विहिरीत पडलेल्या एका वृद्ध इसमाला म्हापसा अग्निशमन दलाच्या जवानांनी सुखरूप बाहेर काढले. माळू विठोबा गावडे (62, मूळ कर्नाटक) असे या वृद्धाचे नाव आहे. ही घटना मंगळवारी रात्री 12.10 वा.च्या सुमारास घडली.

गावडे हे आपल्या भावासमवेत भाड्याच्या घरात राहात होते. घराच्या बाजूने जाताना कडेला असलेल्या विहिरीत तोल जाऊन ते पडले.

घटनेची माहिती मिळताच म्हापसा अग्निशमन दलाचे जवान घटनास्थळी दाखल झाले. सिडी व दोरीच्या साहाय्याने जवान स्वप्नेश कळंगुटकर व अक्षय सावंत हे या खोल विहिरीत उतरले.

तर दलाचे उपअधिकारी अशोक परब, भगवान पाळणी, श्रीनाथ नर्से व साईदत्त आरोलकर या जवानांच्या मदतीने गावडे यांना सुखरूप बाहेर काढले. या घटनेत माळू गावडे यांच्या डाव्या हाताला मोठी जखम झाली आहे. त्यांच्यावर हळदोणा आरोग्य केंद्रात उपचार करण्यात आले.