Goa Government: लोकसभा निवडणूक जवळ आल्यावर कर्मचारी भरतीची आठवण सरकारला होऊ लागली आहे. गेली दोन वर्षे सर्वसाधारण प्रशासन खात्यातील कर्मचारी भरतीसाठी जाहिरात देऊन उमेदवारांकडून घेतलेल्या अर्जांचा सरकारला विसर पडला होता.

आता त्यावेळी अर्ज केलेल्यांची लेखी परीक्षा घेण्यासाठी पुन्हा जाहिरात दिली आहे. नियमानुसार जाहिरात दिल्यानंतर सहा महिन्यांत सर्व भरती प्रक्रिया पूर्ण करावी लागते. या नियमाला बाजूला सारून सरकारने लोकसभा निवडणुकीतील मतांवर डोळा ठेवून ही पदे भरण्यासाठी घाई चालवली आहे.

सरकारच्या सर्वसाधारण प्रशासन खात्यात कनिष्ठ साहाय्यक, वरिष्ठ साहाय्यक आणि लघुलेखक श्रेणी-2 ही पदे भरण्यासाठी 14 ऑक्टोबर 2021 रोजी जाहिरात प्रसिद्ध केली होती. त्यात बहुउद्देशीय कर्मचारी (मल्टी टास्किंग) 31 पदे, कनिष्ठ साहाय्यक 42 पदे, वरिष्ठ साहाय्यकांची २० पदे, लघुलेखक श्रेणी-२ची 15 पदे भरण्यासाठी ऑनलाईन पद्धतीने 1 नोव्हेंबर 2021 पर्यंत अर्ज मागवले होते.

यासाठी उमेदवारांकडून प्रत्येकी 200 रुपयांचे शुल्क आकारले होते. एका उमेदवाराने दोन पदांसाठी अर्ज केला असेल तर त्याला 400 रुपये शुल्क भरावे लागले होते. तरीही अनेकांनी या पदांसाठी अर्ज केले होते. त्यानंतर यातील कनिष्ठ व वरिष्ठ साहाय्यक पदासाठीची भरती करण्याचा सरकारी पातळीवर विसर पडला.