Panjim Smart City: इमॅजिन पणजी स्मार्ट सिटी विकास लिमिटेडने (आयपीएससीडीएल) पाटो परिसरात हाती घेतलेला 15 हजार चौरस मीटरमधील प्रकल्पाचे काम संथ गतीने चालले आहे. बोटॅनिकल गार्डनसह बाल उद्यानाची येथे निर्मिती होत आहे.

ऑगस्ट २०२३ पर्यंत हे काम पूर्ण होणे अपेक्षीत होते, परंतु ज्या गतीने ते काम सुरू आहे, ते पाहता त्याला आणखी पाच-सहा महिन्यांचा कालावधी जाण्याची शक्यता दिसू लागली आहे.

पणजीत चांगली कनेक्टिव्हिटीसह वेगळे पदपथ, मनोरंजन क्षेत्र निर्माण करण्याचे काम आयपीएससीडीएल करीत आहे. पाटो येथील स्टेट बँक ऑफ इंडियाच्या मागील बाजूस मोकळ्या जागेत १५ हजार चौ. मीटरवर २७ कोटी रुपये खर्चाचा हा प्रकल्प स्मार्ट सिटी मिशन अंतर्गत हाती घेतला आहे.

मात्र या प्रकल्पाचे काम संथ गतीने सुरू आहे. दरम्यान, या कामाच्या विलंबाबाबत व्यवस्थापकीय संचालक संजित रॉड्रिग्स यांच्याशी संपर्क साधला असता त्यांनी कॉल स्वीकारला नसल्याने विलंबाचे कारण समजू शकले नाही.

नेवगीनगर, फोंताईन्हास, मळ्यातील नागरिकांसाठी उपयुक्त

नेवगीनगर, फोंताईन्हास आणि मळा येथील नागरिकांसाठी हे ठिकाण उपयुक्त ठरणार आहे. कारण या ठिकाणी मुलांसाठी खेळण्याची सोय असल्याने पणजीतून तसेच इतर ठिकाणाहूनही मुले या ठिकाणी येतील, अशी आशा आहे. त्याशिवाय वृक्षारोपण करण्यात येणार असल्याने हा परिसर हिरवागार असणार आहे.

या परिसरात सुरवातीला कचरा टाकला जात होता, परंतु आर्थिक विकास महामंडळाने (ईडीसी) पाटोवरील ही जागा परिसराचा विकास करण्यासाठी आयपीएससीडीएलकडे दिली होती. आता पाटो परिसराचा ताबा महानगरपालिकेकडे आला आहे. बोटॅनिकल गार्डनसह मुलांसाठी खेळण्यासाठी हा पार्क तयार केला जाणार आहे. त्याशिवाय अंतर्गत भिंतीवर चढण्याचा धाडसी खेळ याठिकाणी उपलब्ध असणार आहे.