Wild Animal Damage Farming Cuncolim

मडकई: कुंकळ्ये प्रियोळ भागातील शेतकरी आधीच औद्योगिक वसाहतीतील प्रदूषणामुळे उदभवणाऱ्या शेतीच्या नुकसानीच्या संकटाला तोंड देत असताना आता रानटी जनावरांचेही मोठे संकट त्यांच्यावर कोसळले आहे.

अलीकडेच सुरेश रामा नाईक यांच्या अननस बागेवर रानडुकरांसह इतर वन्यप्राण्यांनी हल्ला करून मोठ्या प्रमाणात नुकसान केले.

सुरेश नाईक यांनी सांगितले की, चांगली मेहनतीने लावलेली अननस बाग फळधारणा होण्याच्या अवस्थेत होती. मात्र, रानडुकरे आणि गव्यांनी बागेत घुसून झाडे उद्ध्वस्त केली. काही झाडांची मुळे उकरून टाकली, तर काही फळे चावून खराब केली.

या प्रकारामुळे शेतकऱ्याचे हजारो रुपयांचे नुकसान झाले असून, राज्य सरकारने नुकसान भरपाई द्यावी, अशी आशा त्यांनी व्यक्त केली आहे. यंदा पावसाळ्यात रोगराईने उध्वस्त झालेल्या शेतीची योग्य प्रकारे नुकसान भरपाई मिळाली नाही, बहुतांश शेतकऱ्यांना त्याचा लाभही घेता आला नाही. आता तरी राज्य सरकारने शेतकऱ्यांच्या उध्वस्त झालेल्या अननस बागायातीची नुकसान भरपाई द्यावी.

स्थानिक शेतकरी संघटनांनीही या प्रश्नावर तोडगा काढावा, वन्यप्राण्यांपासून पिकांचे संरक्षण व्हावे, अशी मागणी केरी प्रियोळ मधील प्रगतशील शेतकरी दिनेश पांडुरंग गावडे यांनी केली आहे.

गौरेश गावडे, प्रगतशील शेतकरी

संबंधित अधिकाऱ्यांनी या घटनेची पाहणी करून लवकरात लवकर उपाययोजना कराव्यात, पंचायतीनेही या विषयावर गंभीरतेने लक्ष द्यावे, अन्यथा शेतकऱ्यांच्या रोषाला सामोरे जावे लागेल.