Usgao Leopard: उसगावात बिबट्याचा संचार, हा घ्या पुरावा, वनविभाग अलर्ट मोडवर

Leopard Bison Sighting In Goa Usgao

फोंडा: तिराळ-उसगाव येथे ४-५ दिवसापूर्वी अचानक रस्त्यावर आलेल्या गव्याची स्कूटरला धडक बसून आई व मुलगा जखमी होण्याची घटना घडली होती. जखमी रामिता रमेश नाईक व आदेश रमेश नाईक याच्यावर इस्पितळात उपचार केल्यानंतर घरी पाठवण्यात आले आहेत.

तिराळ येथे गेल्या २-३ दिवसापासून बिबट्याचा संचार सुरू आहे. दुपारच्या वेळी बिबट्या लोकवस्तीतील कुत्र्यांची शिकार करीत आहे. त्यामुळे परिसरात भीतीचे वातावरण पसरले आहे. काही दिवसापूर्वी बिबट्या उसगाव येथील हायस्कूल जवळील रस्त्यावर बसलेल्या स्थितीत आढळून येत होता.

बिबट्या पालवाडा व टाकवाडा परिसरातून येत आहे. सध्या बिबट्याला तिराळ भागात कुत्र्यांची शिकार मिळत असल्याने त्याच ठिकाणी त्याने ठाण मांडल्याचा संशय व्यक्त होत आहे.

सध्या वन खात्याने गस्त घालण्यास सुरुवात केली असून ग्रामस्थांनी सावधगिरी बाळगावी, असे आवाहन केले आहे.