Luizinho Faleiro Resigns: तृणमूल काँग्रेसचे राज्यसभा खासदार लुईझिन फालेराे यांनी त्यांच्या खासदारकीचा राजीनामा दिला आहे. राज्यसभेचे सभापती जगदीश धनकर यांच्याकडे फालेरो यांनी राजीनामा सुपूर्द केला. फालेरो हे गोव्याचे मुख्यमंत्री राहिले आहेत.

फालेराे 26 नोव्हेंबर 1998 08 फेब्रुवारी 1999 या कालावधीत गोव्याचे मुख्यमंत्री होते. दरम्यान, त्यांनी कांग्रेसनंतर ममता बॅनर्जी यांच्या नेतृत्वाने प्रभावित होऊन तृणमूल काँग्रेसमध्ये प्रवेश केला होता. खासदारकीचा राजीनामा दिल्यानंतर फालेराे काय भूमिका घेणार याकडे सर्वांचे लक्ष लागून राहिले आहे.

फालेरो यांनी 2022 च्या विधानसभा निवडणुकीत गोवा फॉरवर्ड पक्षाचे नेते विजय सरदेसाई यांच्या विरोधात फातोर्डा येथून लढण्यास नकार दिला होता. त्यामुळे पक्षाचे सर्वोच्च नेतृत्व फालेरो यांच्यावर नाराज होते. TMC ने राज्यसभा खासदार अर्पिता घोष यांचा राजीनामा मागून 2021 मध्ये फालेरो यांना राज्यसभेवर पाठवले होते. अर्पिता घोष यांचा कार्यकाळ 2026 पर्यंत होता.

गोव्यातील पक्षाच्या कामकाजापासून बराच काळ दूर राहिल्यामुळे तृणमूल काँग्रेसच्या पदाधिकाऱ्यांकडून फालेरो यांचा राजीनामा मागितला जात होता. अशी चर्चा राजकीय वर्तुळात आहे.

लुइझिन्हो फालेरो काय म्हणाले?

लुइझिन्हो फालेरो यांनी राज्यसभेच्या खासदारकीचा राजीनामा दिल्यानंतर, "मी TMC सोडत आहे. सध्या अन्य कोणत्याही पक्षात जाण्याचा माझा विचार नाही. भविष्यात काही निर्णय घेतला तर मी तुम्हाला कळवीन." असे म्हणाले.

'ममता बॅनर्जी यांच्या सांगण्यावरून आणि प्रेरणेने ते टीएमसीमध्ये सामील झाले होते. बॅनर्जी यांच्या नेतृत्वाखाली पक्ष पुढे जाईल, अशी आशा त्यांनी व्यक्त केली. माझ्यावर विश्वास ठेवून मला महत्त्वाचे पद दिल्याबद्दल बॅनर्जींचे आभार मानतो.' असे फालेरो यांनी प्रसिद्धीपत्रकाद्वारे म्हटले आहे.

टीएमसीचे निवेदन

फालेराे यांनी राजीनामा दिल्यानंतर टीएमसीने देखील एक निवेदन जारी केले आहे. 'फालेरो यांनी पक्ष सोडल्यानंतर आम्ही दक्षिण गोव्यात दुसरा उमेदवार उभा करू. आम्ही फालेराे यांना उत्तम आरोग्यासाठी शुभेच्छा देतो. ते यापुढेही गोव्यातील जनतेची सेवा करत राहतील, अशी आशा आहे.'