मडगाव: गोवा फॉरवर्ड पक्षाचे प्रमुख विजय सरदेसाई यांनी येथील रवींद्र केळेकर ज्ञानमंदिर शाळेला भेट देऊन स्थानिक बचत गटाकडून दिल्या जाणाऱ्या माध्यान्ह आहाराचा दर्जा तपासला.

स्थानिक महिला बचत गट दर्जेदार माध्यान्ह आहार पुरवूनही मुख्यमंत्री अक्षयपात्रचे समर्थन का करत आहेत हा सवाल विधानसभेत मुख्यमंत्र्यांना करण्याचे आश्वासन सरदेसाई यांनी दिले. यावेळी त्यांच्यासोबत गोवा फॉरवर्ड पक्षाचे प्रशांत नाईक, दुर्गादास कामत आदी नेते होते.

या भेटीदरम्यान त्यांनी वर्गात जाऊन विद्यार्थ्यांना माध्यान्ह आहाराच्या गुणवत्तेबद्दल विचारले. शाळेत मिळणाऱ्या माध्यान्ह आहाराबद्दल विद्यार्थी खूश आहेत का, असा सवालही त्यांनी केला. अनेक विद्यार्थ्यांनी सरदेसाई यांना शाळेत उत्तम दर्जाचे घरगुती जेवण मिळत असल्याची माहिती दिली.

विद्यार्थ्यांशी संवाद साधल्यानंतर सरदेसाई यांनी वर्गातील विद्यार्थ्यांसह माध्यान्ह भोजनाचा आस्वादही घेतला. त्यानंतर सरदेसाई म्हणाले की, महिला बचत गट विद्यार्थ्यांना चांगल्या दर्जाचे जेवण उपलब्ध करून देण्याचे काम करत आहेत.

गोव्याचे लोक संपूर्ण भारतात चांगल्या दर्जाचे अन्न तयार करण्यासाठी आणि वापरण्यासाठी ओळखले जातात. दर्जेदार माध्यान्ह आहार मिळाल्याने विद्यार्थीही खूश आहेत. असे असताना मुख्यमंत्री डॉ. प्रमोद सावंत अक्षयपात्र संस्थेला का पाठिंबा देत आहेत हे अजून आम्हाला कळत नाही.

‘बचत गटाची चांगली सेवा’

स्थानिक बचत गट कठोर परिश्रम करून चांगली सेवा देत आहेत, तर अक्षयपात्र संस्था इतरांकडून देणगी घेते. मुख्यमंत्र्यांनी अक्षयपात्रला पाठिंबा देण्यामागची कारणे मला जाणून घ्यायची आहेत. आगामी विधानसभेच्या अधिवेशनात मी हा मुद्दा उपस्थित करेन आणि मुख्यमंत्र्यांना याविषयी विचारणार आहे, असे सरदेसाई म्हणाले.