आगामी गोवा विधानसभा निवडणुकीत कॉंग्रेस पार्टीला बहुमत मिळेल याची मला खात्री आहे. निकालानंतर आम्ही तत्परतेने पावले उचलून सरकार स्थापन करू. कॉंग्रेस पार्टी गोव्याच्या विकासासाठी काम करेल, असे कॉंग्रेस नेते राहुल गांधी (Rahul Gandhi) म्हणाले. ते मडगाव येथे आयोजित पत्रकार परिषदेत बोलत होते.

भाजपवर (BJP) बोचरी टीका करताना राहुल गांधी म्हणाले, मागील 5 वर्षात भापने कोणतीही विकास कामे केलेली नाहीत. याउलट त्यांनी 2017 मध्ये जनादेशाचा अनादर केला. भाजपने पैशांच्या जोरावर आमचे आमदार स्वत:कडे वळवले. यावेळेस असे होणार नाही. गांधी पुढे म्हणाले, आम्ही गोव्याला 'कोल हब' होऊ देणार नाही. आम्ही खाण काम सुरू करू. आम्ही हे सर्व काही कायदेशीर पद्धतीने करू.

सरकार स्थापनेसाठी कॉंग्रेस (Congress) पार्टी गोव्यात भाजप विरोधी पक्षाबरोबर युती करणार का? असे विचारले असता गांधी म्हणाले, आम्हाला जनतेचा आशीर्वाद मिळेल. युती करण्याची गरज पडणार नाही. सत्तेत आल्यावर आम्ही अनेक योजना राबवू ज्याचा थेट फायदा गोव्याच्या जनतेला होणार आहे.