Businessman Manoj Caculo on Panaji Smart City Work: गोव्याची राजधानी पणजीत सुरू असलेल्या स्मार्ट सिटीच्या कामांसाठी शहरात ठिकठिकाणी खोदून ठेवले आहे. त्यामुळे प्रचंड वाहतूक कोंडी, प्रदूषणाचा त्रास शहरवासीयांना भोगावा लागत आहे.

यावरून आता गोव्यातील उद्योजकांनीही सरकार आणि प्रशासनाला जबाबदार धरत दोषी ठरवले आहे. विशेष म्हणजे, शहराचे आमदार आणि महापौरदेखील या कामांची जबाबदारी घेत नसल्याने त्यांनी चिंता व्यक्त केली आहे.

गोव्यातील सुप्रसिद्ध उद्योजक मनोज काकुलो यांनी पणजीतील स्मार्ट सिटीच्या कामावरून नाराजी व्यक्त केली आहे. शहरात मोठ्या प्रमाणात केलेल्या खोदकामामुळे पणजी शहराची दुरवस्था झाल्याचे म्हणत त्यांनी प्रशासनाला दोषी ठरवले आहे.

काही दिवसांपुर्वीच पणजीचे आमदार आणि महसूल मंत्री बाबूश मोन्सेरात यांनी पणजीतील कामांना मी जबाबदार नाही, तर कंत्राटदार जबाबदार आहेत, असे म्हटले होते.

त्यानंतर त्यांचे पुत्र आणि पणजीचे महापौर रोहित मोन्सेरात यांनीही स्मार्टसिटीच्या कामांचे नियंत्रण महापालिकेकडे नसल्याचे सांगत जबाबदारी झटकली होती. तसेच आगामी पावसाळ्यता पणजीची अवस्था बिकट होऊ शकते, असा इशाराही महापौरांनी दिला होता.

त्यावरून उद्योगपती मनोज काकुलो यांनी सोशल मीडियात पोस्ट केली आहे. त्यांनी पोस्टमध्ये म्हटले आहे की, पणजीची स्थिती दयनीय झाली आहे. आमदार आणि महापौर जबाबदारी घ्यायला तयार नाहीत. आता कोणत्या अभियंता, कंत्राटदाराकडे जायचे? मी त्यांना मते दिली नाहीत.

किंवा मुख्य सचिवांनाही निवडलेले नाही. G20 बैठकांसाठी नागरिकांची गैरसोय होत आहे. माननीय मुख्यमंत्र्यांनी यात लक्ष घालावे. गोव्याचे नाव आपण का खराब करत आहोत??? असा सवालही त्यांनी केला आहे.

काकुला यांनी या पोस्टमध्ये पंतप्रधान, केंद्रीय गृहमंत्री, पीएमओ, मुख्यमंत्री यांना टॅग केले आहे.