Water sports in Goa

गोव्यात समुद्रकिनारे जेवढे प्रसिद्ध आहेत तेवढेच 'वॉटर स्पोर्ट्स' देखील प्रसिद्ध आहेत. देशी विदेशी पर्यटक गोव्यात जलक्रीडांचा आनंद घेत असतात. एवढेच नव्हे तर अनेक प्रसिद्ध व्यक्ती जलक्रीडांचा आनंद घेण्यासाठी गोव्यालाच पसंती देतात. मात्र, पावसाळ्यात राज्यातील जलक्रीडांवर बंदी असते.

दरम्यान, गोवा सरकारने पावसाळ्यातही गोव्यात 'वॉटर स्पोर्ट्स' सुरु करण्याचा प्रस्ताव आणला आहे. राज्यातील प्रमुख नद्यांमध्ये जलक्रीडा सुरु करण्याचा राज्य सरकारचा मानस आहे.

गोवा सरकारने साळ, शापोरा, झुआरी, दोना पावला खाडी, मांडवी, नेरुळ आणि सिक्केरी या नद्यांमध्ये पावसाळ्यात जलक्रीडांना परवानगी देण्याचा प्रस्ताव ठेवला आहे.

पावसाळ्यात योग्य हवामान असताना वर नमूद केलेल्या नद्यांमध्ये जलक्रीडांना परवानगी देण्याचा प्रस्ताव बंदर कप्तान खात्याने ठेवला आहे. असे अलिकडेच्या राजपत्रित अधिसूचनेत म्हटले आहे.

अधिसूचना प्रसिद्ध झाल्यापासून मुदत संपण्यापूर्वी (पाच दिवस) प्रस्तावाबाबत ज्यांना हरकती आणि सूचना गोवा सरकारच्या बंदर विभागाला पाठवू शकतात, असे अधिसूचनेत नमूद करण्यात आले आहे.

अधिसूचनेत वैध ऑपरेटर परवाना आणि विमा यासह जजलक्रीडांबाबत काही अटी व शर्ती नमूद केल्या आहेत.

"पावसाळ्यातील जलक्रीडा उपक्रम केवळ अंतर्देशीय पाण्यातच (inland water) असतील याची खबरदारी घ्यावी. जलक्रीडा उपक्रमांना फक्त सकाळी 9 ते संध्याकाळी 6 या वेळेत परवानगी असेल. कोणत्याही प्रतिकूल हवामानाच्या पार्श्वभूमीवर किंवा बंदर विभागाच्या कॅप्टन किंवा हवामान खात्याच्या कोणत्याही हवामान सूचनांच्या पार्श्वभूमीवर सर्व जलक्रीडा उपक्रम ताबडतोब बंद कराव्यात." असेही या अधिसूचनेत म्हटले आहे.