डिचोलीतील बाजार संकुलात सध्या पावसाची गळती होत असल्याने विक्रेते आणि दुकानदारांसमोर मोठी समस्या निर्माण झाली आहे. या समस्येबाबतीत कळवूनही त्याकडे कोणीच लक्ष देत नाहीत. असे विक्रेत्यांनी सांगून, आम्ही धंदा कसा करायचा? असा प्रश्न उपस्थित केला आहे. डिचोली पालिकेच्या तिसऱ्या टप्प्यातील बाजार संकुलात पावसाच्या गळतीची ही समस्या आहे.

या संकुलाच्या छपरातून सर्वत्र गळती लागत आहे. जोरदार पावसावेळी या संकुलात तर गंभीर समस्या निर्माण होत आहे. विक्रेत्यांसह ग्राहकांनाही या समस्येला तोंड द्यावे लागते. गळतीच्या या समस्येमुळे ग्राहक सोडाच काही विक्रेत्यांनीही सध्या तरी संकुलाकडे पाठ केली आहे. या समस्येची पालिकेने तातडीने दखल घ्यावी. अशी मागणी बाजार संकुलातील फळ-भाजी विक्रेत्यांसह अन्य दुकानदारांनी केली आहे.

भांड्यांचा वापर

पावसाची गळती सुरू झाली, की पाण्यापासून बचाव करण्यासाठी विक्रेत्यांवर बादल्या आदी भांडी ठेवण्याची पाळी येते. बहुतेक विक्रेत्यांनी गळती लागते, त्याठिकाणी ही भांडी ठेवूनच दिली आहेत. पावसाच्या पाण्यात भिजून कांदे आदी भाजी तसेच फळे खराब होत असून, आम्हाला नुकसानीचा फटका बसत आहे. असे फिरोज खान, सुमन पाटील आणि अन्य विक्रेत्यांनी सांगितले.

संकुलात जलधारा

गेल्यावर्षीही या बाजार संकुलात गळतीची समस्या होती. यंदा मात्र ही समस्या मोठी आणि गंभीर झाली आहे. पावसावेळी संकुलाच्या छपरातून पाण्याची गळती लागते. जोरदार पाऊस पडला, की संकुलात सर्वत्र जलधारा सुरू होतात आणि मग फळभाजी आदी विक्रेत्यांसह दुकानदारांची धांदल उडते. या समस्येमुळे विक्रेत्यांसह ग्राहकांनाही मोठा मनस्ताप सहन करावा लागतो. संकुलात साचणाऱ्या पाण्यामुळे विक्रेते आणि ग्राहकांना ''घसरगुंडी''चाही अनुभव येत आहे. असे विक्रेते आणि दुकानदारांचे म्हणणे आहे.