Karnataka Election Result 2023 कर्नाटकच्या यंदाच्या विधानसभा निवडणुकीत भाजपला मतदारांनी धक्का दिला आहे. विशेष म्हणजे, खुद्द पंतप्रधान नरेंद्र मोदी यांचा करिष्मा देखील कर्नाटकात भाजपची सत्ता वाचवू शकलेला नाही. कर्नाटक निवडणुकीत काँग्रेसला बहुमत मिळाल्यानंतर गोवा काँग्रेसचे अमरनाथ पणजीकर यांनी नुकतीच आपली प्रतिक्रिया व्यक्त केलीय.

आज कर्नाटकात निवडणुकीत जे काँग्रेस पक्षाला जनतेने बहुमत दिलंय त्याबद्दल काँग्रेसच्या गोटात आनंदच वातावरण आहे.

आजचा विजय हा कर्नाटकातील काँग्रेसचे नेते, काँग्रेसचे कार्यकर्ते यांच्या मेहनतीचे फळ आहे. त्यांना मी मनापासून शुभेच्छा देतो असे गोवा काँग्रेसचे अमरनाथ पणजीकर यांनी सांगितले आहे.

पणजीकर म्हणाले, कर्नाटकातील जनतेने हे दाखवून दिलंय की, देशात चालणारी हुकूमशाही, खोटेपणा, आणि धर्माच्या नावावर केलं जाणारं राजकारण हे फार काळ टिकणारं नाहीय.

या विजयाबद्दल मल्लिकार्जुन खर्गे, सोनिया गांधी, राहुल गांधी, प्रियांका गांधी कर्नाटकातील काँग्रेसचे नेते डि के शिवकुमार यांचं मी मनापासून अभिनंदन करतो.

या निवडणुकीतील विजयाने एक गोष्ट दाखवून दिलीय की, 2014 च्या निवडणुकीत मोदी सरकारने महागाई, नोकऱ्यांची उपलब्धता याबाबत जी खोटी आश्वासनं दिली होती ती जनतेने खोडून काढली आहेत.

2024 मध्ये देशातून हे जुलूमशाहीचं आणि खोटेपणाचे सरकार जाऊन लोकांचे हित जपणारे काँग्रेसचे सरकार येणार आहे. कर्नाटकीतील विजयामुळे आम्हालाही ऊर्जा मिळाली असून हीच ऊर्जा घेऊन आम्ही गोव्यात देखील काँग्रेसचे सरकार आणणार आहोत.

तसेच आम्हाला खात्री आहि की गोव्यातील जनता सुद्धा गोव्यात काँग्रेसचे सरकार आणण्यासाठी निश्चित सहकार्य करणार आहे असा विश्वास त्यांनी यावेळी व्यक्त केला.