विस्तारा एअरलाइन्सने मनोहर आंतरराष्ट्रीय विमानतळाला आपल्या देशांतर्गत नेटवर्कमध्ये समाविष्ट करण्याची घोषणा केली आहे. विस्तारा एअरलाइन्स मुंबई व बंगळूरु विमानतळ ते मनोहर आंतरराष्ट्रीय विमानतळ या ठिकाणी विमानसेवा सुरू करणार आहे. 14 फेब्रुवारीपासून विमानसेवा सुरू होणार आहे.

मुंबई ते मोपा अशी आठवड्याला ६ विमाने मोपावर उतरणार आहेत तर बंगळूरु ते मोपा या मार्गावर दररोज उड्डाणे चालवली जाणार असल्याची माहिती विस्‍ताराच्या अधिकाऱ्यांनी दिली. विस्‍तारा एअरलाइन्स या मार्गावर A320neo विमानाचा वापर करणार आहे. या विमानातील बैठक व्यवस्था तीन क्लास मध्ये विभागली आहे.

विस्ताराचे सीईओ विनोद कन्नन यांनी याबाबत अधिक माहिती दिली, ते म्हणाले “गोव्यातील मनोहर आंतरराष्ट्रीय विमानतळाचे अलीकडेच उद्घाटन करण्यात आले आहे. आम्ही मुंबई आणि बंगळुरू येथून भारतातील आणि जगभरातील पर्यटकांच्या पसंतीच्या शहरात अतिरिक्त उड्डाणे जाहीर करण्यास उत्सुक आहोत".

"आमच्या ग्राहकांना उत्तम कनेक्टिव्हिटी आणि सुविधा देण्याचे आमचे उद्दिष्ट आहे कारण ते भारतातील सर्वात प्रिय एअरलाइन्सने उड्डाण करतात. आम्हाला आशा आहे की ग्राहक या मार्गांवर आमच्या पुरस्कार विजेत्या उत्पादनांचे आणि सेवांचे कौतुक करतील.”

काही दिवसांपूर्वी अकसा आणि विस्तारा या एअरलाइन्सने विमानाच्या उड्डाणासाठी आवश्यक कर्मचाऱ्यांची नियुक्ती करण्यास सुरु केले होते. दरम्यान, विस्तारा एअरलाइन्स आता 14 फेब्रुवारीपासून मुंबई व बंगळूरु विमानतळ ते मनोहर आंतरराष्ट्रीय विमानतळ या ठिकाणी विमानसेवा सुरू करणार आहे.