पेडणे: विर्नोडा-पेडणे येथील संत सोहिरोबानाथ आंबिये शासकीय महाविद्यालय व संशोधन केंद्राच्‍या भूगोल तसेच कोकणी विभागाच्या संयुक्त विद्यमाने सत्तरी तालुक्यातील शिर-सावर्डे आणि धावे-तार परिसरात ‘पुरण शेती’ या पारंपरिक भातशेती पद्धतीचा अभ्यास करण्यासाठी एकदिवसीय भेट आयोजित करण्यात आली.

या भेटीमागील उद्दिष्ट विद्यार्थ्यांना पारंपरिक भातशेतीशी संबंधित भौगोलिक व पर्यावरणीय घटकांचा अभ्यास करून प्रत्यक्ष अनुभव देणे, तसेच भाषा, संस्कृती आणि शेती पद्धती यांतील परस्परसंबंध समजून घेणे हे होते. याचबरोबर स्थानिक समाजात वापरल्या जाणाऱ्या पारंपरिक कोकणी शेतीसंबंधित संज्ञांचे दस्तऐवजीकरण करण्यावरही भर देण्यात आला.

या उपक्रमात बी.ए., बी.कॉम. आणि बी.एस्सी. (ग्रीन एनर्जी सिस्टिम्स) या शाखांतील भूगोल व कोकणी विभागाचे विद्यार्थी सहभागी झाले होते. या उपक्रमाचे आयोजन प्राचार्य जुवांव कॉस्टा यांच्या मार्गदर्शनाखाली प्रा. प्रियांका परब, डॉ. जयप्रभू कांबळे आणि प्रा. सपना वरक यांनी केले.