पणजी : इंडिगो एअरलाईन्समध्ये चालू असलेल्या सावळ्या गोंधळाचा फटका देशभरातील प्रवाशांना बसत असून त्याचे प्रतिबिंब गोव्यातील दाबोळी विमानतळावरावरही पाहायला मिळाले. मागील तीन दिवसांत विविध राज्यांतील अनेक उड्डाणे रद्द झाली असून काही उड्डाणे मोठ्या विलंबाने पोहोचत आहेत. त्यामुळे शेकडो प्रवाशांचे नियोजन विस्कळीत झाले आहे.

दाबोळी विमानतळावर सकाळपासूनच प्रवाशांची मोठी गर्दी जमा झाली होती. काही उड्डाणे कोणतीही पूर्वसूचना न देता रद्द झाल्याने प्रवाशांना तासन्तास प्रतीक्षा करावी लागली. अचानक झालेल्या बदलामुळे अनेक जण संभ्रमात पडले असून विमानतळावर गोंधळाचे वातावरण निर्माण झाले.

प्रवाशांनी इंडिगो एअरलाईन्सवर नाराजी व्यक्त करत आरोप केले की, “ना कॉल, ना मेसेज… उड्डाण रद्द केल्याची कोणतीही माहिती दिली नाही.” विमानतळावरील कर्मचार्‍यांकडूनही समाधानकारक उत्तर मिळत नसल्याची तक्रार प्रवाशांनी केली. त्यामुळे संतप्त प्रवाशांनी एअरलाईन्सच्या कार्यपद्धतीवर प्रश्नचिन्ह उपस्थित केले आहे.

अचानक उड्डाणे रद्द झाल्याने पर्यटकांचे टूर प्लॅन कोलमडले, तर व्यावसायिक कारणांसाठी प्रवास करणाऱ्या अनेक प्रवाशांचे महत्त्वाचे कार्यक्रम हुकले. गर्दी, अडथळे आणि माहितीचा अभाव यामुळे दाबोळी विमानतळावर तणावाचे वातावरण कायम आहे.

दरम्यान, इंडिगो एअरलाईन्सकडून या गोंधळाबाबत अद्याप अधिकृत स्पष्टीकरण देण्यात आलेले नाही. प्रवासी मात्र तत्काळ तोडगा काढावा आणि उड्डाण सेवांबाबत निश्चित माहिती द्यावी, अशी मागणी प्रवासी करत आहेत.