पणजी : राज्यात मागील काही दिवसांपासून गोवा पोलिसांनी अमली पदार्थ विरोधात धडक कारवाया सुरू केल्या असून, सोमवारी (२१ जुलै) त्यांच्या या मोहिमेला मोठे यश मिळाले आहे. वेर्णा पोलिसांनी पिरनी सर्कल बस स्टॉपच्या मागील भागात छापा टाकत २.२ किलो गांजासह एकाला अटक केली आहे.

अटक करण्यात आलेल्या व्यक्तीचे नाव राहुल कुमार केरवट (वय २८) असून तो मूळचा मध्य प्रदेशचा रहिवासी आहे आणि सध्या वेर्ण्यात वास्तव्यास होता. पोलिसांनी त्याच्याकडून जप्त केलेल्या गांजाची बाजारमूल्य २ लाख २१ हजार ३८० रुपये इतकी असल्याची माहिती समोर आली आहे.

राज्यातील पर्यटकांची वर्दळ असलेल्या हणजूण, वागातोर, बागा परिसरात गेल्या काही महिन्यांपासून अमली पदार्थांची वाढती तस्करी पोलिसांसाठी डोकेदुखी ठरत आहे. त्यामुळेच पोलीस यंत्रणेने या भागात विशेष लक्ष केंद्रित केले आहे.

याआधीही, १७ जुलै रोजी डिचोली पोलिसांनी शिरगाव परिसरात मध्यरात्री कारवाई करत एका स्थानिक युवकाला गांजासह अटक केली होती. त्याच्याकडून २२८ ग्रॅम गांजा, एक स्कूटर व मोबाईल जप्त करण्यात आला होता.

राज्यातील अमली पदार्थांच्या साखळीवर तोडगा काढण्यासाठी विविध पोलीस ठाण्यांमार्फत विशेष पथक तयार करण्यात आली आहेत. स्थानिकांच्या सहकार्याने अशा प्रकारच्या कारवायांना अधिक बळ मिळणार असल्याचे पोलिसांनी स्पष्ट केले आहे.