वास्को : वेर्णा औद्योगिक वसाहतीमध्ये आज सकाळी कामाला जाणाऱ्या दोन युवतींसाठी एक कार ‘काळ’ बनून आली. रस्ता ओलांडताना कारने या दोघींना जोरदार धडक दिली. यात अनिषा सतीश बोरकर (वय २३ वर्षे, रा. केपे) ही युवती जागीच ठार झाली, तर अक्षता उदय नाईक (वय २३ वर्षे, मूळ कारवार) ही गंभीर जखमी झाली. तिच्यावर गोमेकॉत उपचार सुरू आहेत.

याप्रकरणी वेर्णा पोलिसांनी कारचालक जोनाथन परेरा (वय १९ वर्षे, रा. आगशी) याच्याविरोधात गुन्हा नोंद केला आहे.पोलिसांनी दिलेल्या माहितीनुसार, जोनाथन हा वेर्णा येथील पाद्री कोसेसांव महाविद्यालयात शिकतो. परीक्षा देण्यासाठी तो कारने शनिवारी सकाळी घराकडून महाविद्यालयाकडे निघाला होता.

सव्वाआठच्या सुमारास तो वेर्णा औद्यगिक वसाहतीसमोरच्या महामार्गावरून जात होता. त्यावेळी हा अपघात घडला. या अपघातानंतर घाबरलेला जोनाथन थेट वेर्णा पोलिस स्थानकात गेला. त्याने घडलेल्या प्रकाराची माहिती पोलिसांना दिली.

अनिषा आणि अक्षता या वेर्णा औद्योगिक वसाहतीतील एका फार्मास्युटिकल्स कंपनीत कामाला आहेत. वेर्णा पोलिसांनी पंचनामा केला. याप्रकरणी पोलिस निरीक्षक आनंद शिरोडकर यांच्या मार्गदर्शनाखाली वेर्णा पोलिस पुढील तपास करीत आहेत.

अन् क्षणात दोघी रस्त्यावर आपटल्या

जोनाथनच्या वेगवान कारची धडक रस्ता ओलांडणाऱ्या अनिता आणि अक्षता यांना बसल्याने त्या दोघी रस्त्यावर जोरात आपटल्या. यावेळी अनिषा जागीच मरण पावली, तर अक्षता गंभीर जखमी झाल्याने तिला उपचारासाठी गोमेकॉत नेले. तिच्यावर उपचार सुरू आहेत.