Margao Bus Accident: रस्ता ओलांडताना खासगी बसची धडक, ज्येष्ठ नागरिक ठार; मडगावातील दुर्दैवी घटना

मडगाव: रस्ता ओलांडताना बसची धडक बसून एक ज्येष्ठ नागरिक ठार झाला. शुक्रवारी सकाळी साडेसातच्या दरम्यान येथील ओल्ड मार्केट सर्कलजवळ अपघाताची घटना घडली. जोसेफ बाप्तिस्ता (६७) असे मृताचे नाव आहे. तो मूळ मालभाट येथील असून सध्या तो बड्डे येथे राहात होता, अशी माहिती फातोर्डा पोलिसांनी दिली.

उपनिरीक्षक सचिन पाटील पुढील तपास करीत आहेत. याप्रकरणी बसचालक शेख इरफान (रा. दवर्ली) याच्यावर निष्काळजीपणे वाहन चालवून अपघाताला कारणीभूत ठरल्याचा गुन्हा नोंद केला आहे.

पोलिसांनी दिलेल्या माहितीनुसार, ही बस एका खासगी कंपनीतील लोकांच्या प्रवासासाठी वापरली जाते. रस्ता ओलांडताना अचानक पुढून वाहने येत असल्याचे बघून जोसेफ गांगरला. तो परत माघारी येऊ लागला असता, त्याला समोरून येणाऱ्या बसने धडक दिली.

रस्त्यावर पडल्याने त्याच्या डोक्याला गंभीर इजा झाली. त्यातच त्याचा घटनास्थळी मृत्यू झाला. दक्षिण गोवा जिल्हा इस्पितळात नेले असता, डॉक्टरांनी त्याला मृत घोषित केले.