पणजी: केंद्रीय मंत्री स्मृती इराणी यांच्या कुटुंबीयांकडून कथितरित्या चालविल्या जाणाऱ्या आसगाव येथील ‘सिली सोल्स कॅफे ॲण्ड बार’च्या वादग्रस्त कथित मद्य परवान्यासंदर्भातील ॲड. आयरिश रॉड्रिग्स यांच्या तक्रारीवरील अंतिम सुनावणी अबकारी आयुक्त नारायण गाड यांच्यासमोर आज पूर्ण झाली. त्यावरील निर्णय 20 ऑक्टोबर रोजी होणार आहे. त्यामुळे सध्या बंद असलेल्या सिली सोल्सचे भवितव्य त्या दिवशीच ठरणार आहे.

(Silly Souls Bar And Restaurant)

सिली सोल्स कॅफे ॲण्ड बारचे मालक ॲन्थनी डि गामा यांनी हे आस्थापन 1 जानेवारी 2021 पासून 10वर्षांच्या कालावधीसाठी 50 हजार रुपये मासिक भाड्याने ‘एटॉल फूड ॲण्ड बेव्हरेजेस ‘यांना दिले होते. त्यासंदर्भातील कागदोपत्री व्यवहारही झाला होता. सिली सोल्स कॅफे ॲण्ड बारसाठी वापरलेला जीएसटी क्रमांक ‘एटॉल फूड ॲण्ड बेव्हरेजेस’चा असून अन्न व औषध प्रशासनाकडून घेतलेला परवानाही त्यांच्याच नावावर आहे.

कोविड तसेच लॉकडाऊनचा फायदा उठवून डि गामा यांनी काही माहिती लपवून ठेवून अबकारी खात्याकडून मद्य परवाना मिळवला होता.

त्यामुळे डि गामा यांनी मद्य परवान्यासाठी अर्ज करून गोवा उत्पादन शुल्क कायद्यातील तरतुदींचे उल्लंघन केल्याने यामध्ये बनवेगिरी उघड होत आहे. यापुढे अशाप्रकारे कोणीही बनवेगिरी करण्याचा प्रयत्न करू नये, यासाठी समाजात कठोर संदेश जाण्यासाठी खात्याने बनवेगिरीप्रकरणी फौजदारी कारवाई करण्याचा आदेश द्यावा, अशी विनंती तक्रारदार ॲड. आयरिश रॉड्रिग्स यांनी केली आहे.

इराणी हेच संचालक

डि गामा यांनी 5 जानेवारी 2021 रोजी अबकारी खात्याकडे मद्य परवान्यासाठी अर्ज केला, तेव्हा सिली सोल्स हे ‘एटॉल फूड ॲण्ड बेव्हरेजेस’कडे होते व त्यांची उग्रया मर्कंटाईल प्रा.लि.शी भागीदारी आहे, ज्याचे केंद्रीयमंत्री स्मृती इराणी यांचे पती झुबीन इराणी हे संचालक आहेत, हे आज पुराव्यानिशी रॉड्रिग्स यांनी युक्तिवाद करताना सांगितले.