Vegetable Rates In Goa

पणजी: राज्यात चतुर्थीपासून सातत्याने भाजीपाल्याच्या दरात वाढ होत आहेत. सर्वसामान्य नागरिक महागाईच्या भडक्यात होरपळत आहेत. जीवनावश्‍यक असणाऱ्या कांदा, टोमॅटोच्या दरात मोठ्या प्रमाणात वाढ झाली असल्याने सर्वसामान्य मध्यमवर्गीयांसमोर आपल्या कुटुंबाचा गाडा कसा चालवावा, असा प्रश्‍न उपस्थित होत आहे.

राजधानी पणजीत नवा कांदा ७० रुपये किलो तर जुना कांदा ८० रुपये किलो दराने विकला जात आहे. टोमॅटो ६० रुपये किलो दराने विकला जात असून भाज्यांच्या दरातही मोठ्या प्रमाणात वाढ झाली आहे. फलोत्पादन महामंडळाच्या गाळ्यांवरदेखील कांदा-टोमॅटोचे दर पन्नास रुपयांच्या वर आहेत. पुढील आठवडाभर राज्यात कांदा-टोमॅटोच्या दर वाढत राहणार असल्याचे विक्रेते सांगतात.

काही दिवसांत नवरात्री उत्सव असणार असून मोठ्या प्रमाणात भाजीपाल्याला मागणी आहे. राज्यात भाजीपाला बेळगावहून (Belgaum) आयात केला जात असल्याने विक्रेत्यांचा वाहतुकीचा खर्च वाढतो, त्यामुळे दरात मोठ्या प्रमाणात वाढ होत आहे.

चिबूडाला मागणी

राज्यात आता मोठ्या प्रमाणात पावसाळी भाज्या बाजारात दाखल झाल्या आहेत. पावसाळ्यात शेतकऱ्यांनी लावलेल्या चिबूड, काकडी, दोडगी, भोपळा तसेच इतर भाज्यांचे पीक येऊ लागले आहे. मध्यम आकाराचा एक चिबूड १०० ते १२० ररुपयांना विकला जात आहे. बाजारात चिबूडाला मोठ्या प्रमाणात मागणी आहे. तसेच पणजी बाजारात पन्नास रुपयांना पाच अशा दराने काकडी विकल्या जात आहेत.