Vasco News : वेर्णा येथे दोघांमध्‍ये झालेल्या भांडणातून एकाने दुसऱ्याला चाकूने भोसकले. त्‍यानंतर तो दुसऱ्या राज्यातून पळून जाण्याच्या प्रयत्नात असताना पोलिसांनी तपासाची गतीने चक्रे हलवत संशयिताला रेल्वेस्थानकावर जेरबंद केले. पंकज असे त्‍याचे नाव आहे.

मिळालेल्‍या माहितीनुसार, पंकज (21) हा मूळ उत्तरप्रदेश येथील रहिवासी कामाच्या निमित्ताने गोव्यात आला होता. गेल्या काही काळापासून तो वेर्णा कोन्सुवा परिसरात वास्तव्यास आहे. त्याने लवकुश (26) या दुसऱ्या एका तरुणाला चाकूने भोकसले. यात लवकुश गंभीर जखमी झाला आहे. लवकुश हा देखील मूळचा उत्तर प्रदेशातील. त्‍याच्‍यावर चाकू हल्ला केल्यानंतर पंकज रेल्वेने राज्यातून पळून जाण्याच्या प्रयत्नात होता. सदर घटना दि. 26 मार्च रोजी घडली होती. पोलिस संशयिताच्‍या मागावर होते.

दरम्यान, काल बुधवारी माहिती मिळाली की, संशयित आरोपी पंकज वास्को रेल्वेस्थानकावर दिसला असून तो पळून जाण्याच्या बेतात आहे. त्यानुसार वेर्णा पोलिस स्थानकाचे उपनिरीक्षक उत्क्रांतराव देसाई यांच्या नेतृत्वाखाली हेड कॉन्स्टेबल सुदेशकुमार देसाई यांच्या पथकाने वास्को रेल्वे स्थानकावर वास्कोचे पोलिस हेड कॉन्स्टेबल सचिन बांदेकर यांच्या मदतीने सापळा रचला आणि संशयिताला ताब्यात घेतले. पुढील तपास वेर्णा पोलिस निरीक्षक डायगो गासियस यांच्या मार्गदर्शनाखाली व मुरगावचे पोलिस उपअधीक्षक सलीम शेख यांच्या देखरेखीखाली सुरू आहे.