वाळपई: भिरोंडा पंचायत क्षेत्रातील पिळ्येकरवाडा वांते, सत्तरी येथील अंजनी तिवरेकर (गावडे) यांच्या घराला शुक्रवारी सकाळी आग लागून मोठे नुकसान झाले. सुदैवाने, आगीची घटना घडली तेव्हा घरात कुणीही नव्हते त्यामुळे जीवितहानी टळली.

आगीत विजेवरील उपकरणे, रोख दीड लाखांची रक्कम, महत्त्वाची कागदपत्रे, सोन्याचे दागिनेही जळून खाक झाले. अंदाजे १० लाखांचे नुकसान झाल्याचा अंदाज व्यक्त करण्यात आला आहे.

अंजनी तिवरेकर ह्या रोजंदारी करून आपला उदरनिर्वाह चालवतात. सकाळी नेहमीप्रमाणे त्या कामावर गेल्या होत्या. त्यांची मुलगी शाळेत गेली होती. सकाळी ११ वाजताच्या दरम्यान घरातून धूर निघत असल्याचे शेजाऱ्यांच्या लक्षात आले.

त्यानंतर त्यांनी तातडीने अंजनी यांना कळविले. त्या धावतच घराकडे पोहोचल्या, मात्र तोपर्यंत घरातील सर्वच साहित्य जळाले होते. काही वेळातच त्यांची मुलगी ही घटनास्थळी पोहोचली. या दोघींनी मिळून उर्वरित आग विझवण्याचा प्रयत्न केला. मात्र या आगीत सर्व सामान खाक झाले होते.

घटनेची माहिती मिळल्यानंतर वाळपई पोलिस घटनास्थळी दाखल झाले व घरातील गॅस सिलिंडर सुरक्षित बाहेर काढला. त्यानंतर अग्निशमन दलाचे जवान सतीश के. नाईक, राहुल कवठणकर, अविनाश नार्वेकर , गंगाराम पवन घटनास्थळी दाखल झाले आणि आग आटोक्यात आणली.

अग्निशमन दलाने अंदाजे ५ लाख रुपयांची मालमत्ता वाचवण्यात यश मिळवले. वाळपई पोलिसांनी पंचनामा केला असून पुढील तपास वाळपई पोलिस उपनिरीक्षक सोहम मळीक यांच्या देखरेखीखाली सुरू आहे.

अजून कारण अस्पष्ट

आग कशी लागली याचे स्पष्ट झालेले नाही. प्राथमिक तपासात शॉर्ट सर्किटमुळेच आग लागल्याची शक्यता वर्तवण्यात आली आहे. घरावर पत्र्यांची छप्पर व बाजुला तुरटी असल्याने पेट अधिक वेगाने पसरला. अंजनी ह्या रोजंदारीवर काम करीत असल्याने त्यांनी एक एक पैसा जमा करुन ठेवला होता. तो असा अचानक आगीत खाक झाल्याने त्यांना प्रचंड धक्का बसला आहे. त्याना मदतीचा हात मिळावी, अशी मागणी स्थानिकांनी केली आहे.